«Ստեղծված վիճակը կարող է հանգեցնել Հայաստանի՝ ամենախայտառակ փուլ մտնելուն։ Սկսվում է ճգնաժամ և առկա պայթունավտանգ իրավիճակը կհանգեցնի նրան, որ Խորենացին կդառնա խորենացիներ»,- «Առաջին լրատվական»-ի հետ զրույցում ասաց Սարգիս Հացպանյանը։
Նրա խոսքերով՝ եթե ամեն ինչ այսպես շարունակվի, ապա ըմբոստության օջախներ կհայտնվեն նաև տարբեր մարզերում և համայնքներում։
«Ես վստահ եմ, որ ՀՀ տարբեր մարզերում ժողովուրդը այսպես հրաբխային վիճակում է, մարդկանց համբերության բաժակը լցվել է, երբ իրեն բանի տեղ չեն դնում և մի քանի մարդիկ պարզապես իրենց ուզածն են անում։ Հասարակ ժողովրդին հիշում են, երբ զինվոր է պետք։ Այլ պարագայում հասարակության կարծիքը որևէ մի պաշտոնյայի չի հետաքրքրում»,- նկատեց Հացպանյանը։ Նրա խոսքերով՝ իշխանությունը շատ լավ հասկանում է, որ ստեղծված վիճակը հանգեցնելու է պայթյունի, բայց գիտակցված գնում է դրան, քանի որ, հավանաբար, ինչ-որ մի ուժ, օտար ուժ սատարում է այս լարումը, սրում է վիճակը՝ ունենալով սեփական շահերը։ «Ես հակված եմ, որ դա ռուսական ուժ է, քանի որ քառօրյա պատերազմը ցույց տվեց մի շատ կարևոր բան, որ Ռուսաստանը լինելով Ադրբեջանին զինող, թիկունքին կանգնած ուժ, բացահայտվեց ամբողջ աշխարհին։ Բացահայտեց, որ մենք չունենք զինուժ, մենք ունենք զինվոր։ Այդ օրերը բացահայտում էին աշխարհի համար, որ Հայաստանը չունի բանակ»,-ասաց Հացպանյանը՝ հավելելով, որ Խորենացի փողոցի դեպքերն էլ ցույց տվեցին, որ մենք ոչ միայն բանակ չունենք, այլև Ազգային անվտանգության ծառայություն։
«Նրանց քթի տակ այսպիսի գործողություն պլանավորելը ծիծաղելի է, քանի որ այդ տղաների հեռախոսները գիշեր-ցերեկ լսվում են։ Միայն Պավլիկի հեռախոսը լսելով իրենք կիմանային, որ այսպիսի գործողություն է պլանավորվում։ Բայց չիմացան, ինչը փաստում է, որ մենք ԱԱԾ չունենք։ Չունենք նաև ոստիկանություն, քանի որ հնարավոր է մի քանի տասնյակ անձանցով գնալ և գրավել ՊՊԾ գնդի մի ամբողջ տարածք։ Այսինքն չունենք բանակ, ոստիկանություն և ԱԱԾ։ Ուժային երեք կառույց և այս վիճակը ի ցույց է դրվում ամբողջ աշխարհին»,- նկատեց Հացպանյանը՝ ավելացնելով, որ սա ձեռնտու է նախ Ադրբեջանին, Թուրքիային, ապա նաև Ռուսաստանին։
Առավել մանրամասն՝ տեսանյութում։
