Ալեք Ենիգոմշյանին մեղադրանք դեռևս չի առաջադրվել։ Նա գտնվում է կասկածյալ կարգավիճակում»,- «Առաջին լրատվական»-ի հետ զրույցում ասաց Ենիգոմշյանի պաշտպան, փաստաբան Նիկոլայ Բաղդասարյանը։ Նրա խոսքերով՝ ինքն այն կարծիքին է, որ տվյալ գործերով անձանց ձերբակալելն ապօրինի է, քանի որ որևէ հիմք չկա դրա համար։ Բաղդասարյանը նշեց, որ իր պաշտպանյալը բերման է ենթարկվել նախաքննական մարմնի կողմից մի շարք խախտումների արդյուքնում։ «Հիմնական խնդիրը ծագեց այն ժամանակ, երբ իրեն ներկայացվեց կասկածյալ լինելու մասին որոշումը և առաջարկվեց կարդալ, ծանոթանալ և ստորագրել։ Նախաքննական մարմինն իր համար պարզեց մի անսպասելի բան, որ Ենիգոմշյանը չի տեսնում և չի կարող ծանոթանալ որոշմանը։ Այնուհետև հրավիրեցին թարգմանիչ և պարզվեց, որ նա էլ չի տեսնում։ Եվ շատ տարօրինակ էր, թե ինչու են կույր մարդուն տեքստ թարգմանելու համար նորից կույրի հրավիրում»,- ասաց Բաղդասարյանը՝ հավելելով, որ նախաքննական մարմինը այդպես էլ անհրաժեշտ փաստաթղթերը չի ներկայացրել, թե ինչի մեջ է կասկածվում իր պաշտպանյալը։ «Ստացվում է, որ Ենիգոմշյանը ձերբակալվել է առանց նախաքննական մարմնի կողմից իրավական ընթացակարգերը պահպանելու։ Եթե իրենք չէին կարող թարգմանիչ ապահովել և անհրաժեշտ փաստաթղթերը ներկայացնել իմ պաշտպանյալին, ապա իրենք իրավուք չունեին այդ գործողությունը կատարելու»,- հավելեց փաստաբանը։
Նիկոլայ Բաղդասարյանը դժվարացավ պատասխանել, թե ինչու հենց երեկ ձերբակալվեց Ենիգոմշյանը։ «Դուք ինքներդ պատկերացրեք, թե հաշմանդամ մարդը ինչպես կարող էր օժանդակել հանցագործությանը։ Տրամաբանությունը հուշում է, որ այդ անձինք և զենք են ձեռք բերել, և արարք են կատարել, որին օժանդակել պետք չէր և Ենիգոմշյանը չէր կարող»,- նկատեց Բաղդասարյանը։
Առավել մանրամասն՝ տեսանյութում։