Գերագույն խորհրդի պատգամավոր, հակաճգնաժամային նախաձեռնող խորհրդի անդամ Ալբերտ Բաղդասարյանը «Առաջին լրատվական»-ին տեղեկացրեց, որ իրենք կանխատեսել էին ոստիկանության երեկվա հնարավոր գործողությունները, ուստի ոստիկաններին հաջողվեց բերման ենթարկել խորհրդի միայն 5 անդամների:
«Ժողովրդական ապստամբությունը շատ լավ պլանավորել է Բաղրամյան 26-ը՝ ամեն ինչ անում է, որպեսզի ամբողջ ազգը ոտքի կանգնի ու իրենց սրբի-տանի»,- ասաց մեր զրուցակիցը:
Նրա խոսքով՝ իրենց խնդիրն այն է, որ այդ «սրբել-տանելուց» կարողանան տարբերել թացը չորից և երկրին վնաս չտան:
Ինչպես նկատեց Ալբերտ Բաղդասարյանը՝ այժմ շարժումը առաջնորդողները պետք է բավարարեն 2 պայմանի. «Առաջինը՝ իրենց պահանջները համահունչ լինեն «Սասնա ծռերի» պահանջներին և այդ տղաների կողմից վայելեն վստահություն, և երկրորդ՝ դառնան ժողովրդին միավորող և կազմակերպող ուժ: Այդպիսի երաշխիքներ կարող էին ունենալ միայն Ալեք Ենիգոմշյանը և Կյուրեղյանների հայրը՝ Արմենակ Կյուրեղյանը: Բացի այդ՝ այս խորհուրդը ապակուսակցական է, և այս տղաների արածը չի հետապնդում ինչ-որ կուսակցության համար ճանապարհ բացելու նպատակ»:
«Սա ապստամբություն է, տղաները ապստամբներ են, ոչ թե զինված խումբ. սա է քաղաքական գնահատականը: Հետևաբար անցել են իշխանության կողմից թելադրված ստանդարտ կոչերի ժամանակները: Ամենակարևորը, որ ժողովուրդը ցուցաբերի քաղաքացիական անհնազանդություն: Իշխանությունները պետք է գիտակցեն, որ այլևս էս ժողովրդին չեն կարող խցկել իր բունը, և պետք է անցնեն բանակցությունների: Ուստի պահանջում ենք Ալեք Ենիգոմշյանի անհապաղ ազատ արձակումը»:
Ինչ վերաբերում է ՊՊԾ գնդում գտնվող տղաների անվտանգության երաշխավորմանը, ապա Ալբերտ Բաղդասարյանն ասաց. «Նրանց անվտանգության առաջին երաշխիքը իրենց զենքն է, իրենց կամքն ու ոգին: Նրանք գիտեն, որ չեն գնացել այնտեղ փլավ բաժանելու: Նրանք մահապարտներ են, հետևաբար ԱԱԾ-ն հոխորտալու փոխարեն՝ թող մտածի իր հնարավոր գործողությունների հետևանքների մասին»:
