«Այսօր իրավիճակը կտրուկ փոխվել է։ Եթե նախորդ օրերին կարելի էր ինչ-ինչ երկխոսություն, ապա հիմա դա անհնար է դարձել»,-«Առաջին լրատվական»-ի հետ զրույցում ասաց քաղաքագետ Սուրեն Զոլյանը։ Նրա խոսքով՝ իրականում իշխանափոխություն տեղի ունեցել է, քանի որ իշխանությունը միայն ոստիկանական զորքերին հրահանգ տալը չէ։ Իշխանությունը այն է, երբ կարելի է հրահանգել՝ առանց ուժ կիրառելու։
«Այսինքն՝ հասարակությունը պետք է վստահի, որ նոր կատարի այդ հրամանը, բայց այդ վստահությունը չկա։ Եվ այդ առումով Սերժ Սարգսյանը կորցրել է իր լեգիտիմությունը, եթե ուներ։ Այսօր ինքը ոչ միայն չի կարողանում արտաքին աշխարհին թելադրել, ֆուտբոլային դիվանագիտությամբ զբաղվել։ Նույն վիճակն է նաև երկրի ներսում»,- նկատեց Զոլյանը։
Նրա դիտարկմամբ, այն, որ իշխանափոխություն տեղի ունեցել է, վկայում են նաև ցուցարարների վարկարկումները։ «Նրանք այս օրերին վանկարկում են Պավլիկ, վանկարկում են Ժիրայր։ Այսինքն՝ նրանք վանկարկում են այն անձանց անունները, ում վստահում են։ Այսօր քաղաքական օրակարգ թելադրողը Սեֆիլյանն է, ոչ թե Սերժ Սարգայանը։ Մեր երկիրը քաղաքացիական պատերազմի շեմին է կանգնած, երբ բանտում նստած անձն է թելադրում քաղաքական օրակարգը։ Այսօր հասարակության համար այդ անձը, այդ տղաները հերոսներ են։ Սա փաստ է, և սա ցույց է տալիս, թե ինչ խոր խզում կա հասարակության և իշխանության միջև»,- նկատեց Զոլյանը։
Քաղաքագետի խոսքով՝ քաղաքական կուսակցություններն ավելի ադեկվատ պետք է արձագանքեն ստեղծված իրավիճակին, լուծումներ, ելքեր առաջարկեն, այլ ոչ թե փորձեն օգտվել իրավիճակից։
Ինչ վերաբերում է իրավիճակի հանգուցալուծմանը, ապա, քաղաքագետի խոսքով, լուծումներ կարելի է գտնել, որի համար վստահություն է պետք երկուստեք։ «Բոլոր դեպքերում Հայաստանը չի սահմանափակվում իշխանություններով։ Հասարակությունը պետք է մոբիլիզացվի, կոնկրետ որոշումներ կայացնի»,- ասաց Զոլյանը։
Առավել մանրամասն՝ տեսանյութում: