Սփյուռքում ժողովրդի մեծամասնությունը աջակցում է «Սասնա ծռերին»՝ վստահեցնում է «Հայկական վերածնունդ» համահայկական կազմակերպության Փարիզի մասնաճյուղի համակարգող Շանթ Ոսկերիչյանը:
Ինչպես հայտարարեց նա՝ «Սասնա ծռերը» բացարձակապես ահաբեկիչներ չեն, այլ իրենց ազգի նվիրյալ անձինք՝ Արցախի հողը պաշտպանած տղերք:
«Սա համայն հայության պրոբլեմն է»,- հայտարարեց Շանթ Ոսկերիչյանը՝ տեղեկացնելով, որ իրենք հավաք են կազմակերպել նաև Ստրասբուրգում Եվրախորհրդի առջև, որին մասնակցել են Գերմանիայից, Բելգիայից, Հոլանդիայից և Ֆրանսիայի զանազան քաղաքներից հայորդիներ՝ իրենց վրդովմունքն արտահայտելու ՀՀ իշխանությունների ծախված ԶԼՄ-ների ապատեղեկատվության կապակցությամբ:
Նրանք պահանջում էին բոլոր քաղբանտարկյալների ազատ արձակում և վերջապես նրանց շնորհիվ Հայաստանում իրավական պետության ստեղծում: Շանթ Ոսկերիչյանի խոսքով՝ սա «25 տարի շարունակված ժողովրդի տանջումների կուտակման արտահայտությունն է: Ուրիշ ճար չի մնացել: Այս չընտրությունների միջոցով անհնարին է Հայաստանում որևիցե բան փոխել»:
Նա ՀՀ նախագահ Սերժ Սարգսյանին համեմատեց կազինոյի տիրոջ հետ, որտեղ միշտ այդ տերն է շահում. «Ձեզ հավաստիացնում եմ, որ սա Հայաստանի և Սփյուռքի վերջին շանսն է: Եթե սրանով Հայաստանում չկարողանանք ստեղծել իրավական պետություն, այլևս երբեք չենք ունենա, և Հայաստանը կվերածվի օտար երկրների գաղութի»:
Նա հայ ժողովրդին կոչ արեց մասնակցել ոչ թե 5-10 հազարով, այլ 30-40 հազարով և բերման ենթարկել այն ոստիկաններին, ովքեր իրենց են բերման ենթարկում: