ԱԺ ՀԱԿ խմբակցության պատգամավոր Լյուդմիլա Սարգսյանը այն պատգամավորների թվում է, ովքեր միացել են Նիկոլ Փաշինյանի նախաձեռնությանը՝ Հայաստանում ստեղծված իրավիճակը քննարկելու համար այսօր գումարել Ազգային ժողովի նիստ: Հիշեցնենք. այս նախաձեռնությունը իրականացնելու համար անհրաժեշտ է 44 պատգամավորի ստորագրություն, սակայն առայժմ ստորագրել է ընդամենը 9 պատգամավոր, և դեռ անհրաժեշտ է 35 պատգամավորի ստորագրություն:
Լյուդմիլա Սարգսյանը պատգամավորների այս լռության կապակցությամբ ասաց՝ քանի որ ԱԺ-ն ներկայացուցչական մարմին է, ուստի «մենք պարտավոր ենք ժողովրդին հուզող այս լրջագույն խնդրում լուծումներ փնտրել հենց Ազգային ժողովում»:
Մեր զրուցակիցը անհասկանալի է համարում նաև այն հանգամանքը, որ երկրում տիրող արտակարգ իրավիճակի պայմաններում նախագահ Սերժ Սարգսյանը հուլիսի 17-ից հետո 6 օր շարունակ լռություն պահպանեց:
Լյուդմիլա Սարգսյանը չընդունելով հանդերձ պայքարի այս եղանակը, այնուամենայնիվ՝ ընդունում է, որ «շատ շատերը չտեսնելով ելքեր՝ կարող են գնալ այս ճանապարհով, որը կարող է եզակի չլինել: Ուրեմն պետք է հասկանալ, թե պատճառները որտեղից են գալիս, և փորձել այդ խնդիրները լուծել»:
Նրա խոսքով՝ ի սկզբանե «Սասնա ծռերը» բացառեց խնդրի հանգուցալուծման քաղաքական ընթացքը, «ինչը մեծագույն սխալ էր: Իսկ այժմ ես չեմ տեսնում մի մարդու, որն այս ամենը կարող է դնել քաղաքական գործընթացի մեջ»:
ԱԺ պատգամավորը «Սասնա ծռերի» 3 պահանջներից՝ նախագահի հրաժարական, ժամանակավոր կառավարության ձևավորում և քաղբանտարկյալների ազատ արձակում, ամենաիրատեսականը համարում է Ժիրայր Սեֆիլյանի ազատ արձակումը:
Իսկ ինչ վերաբերում է Խորենացու փողոցում տեղի ունեցած համատարած ձերբակալություններին, ապա պատգամավորի խոսքով՝ «իշխանությունն այստեղ շատ մեծ սխալ է թույլ տալիս, իսկ Լևոն Բարսեղյանի ձերբակալման հիմքն ուղղակի ծիծաղելի է»:
Մանրամասները՝ տեսանյութում: