Ինչպես արդեն տեղեկացրել ենք, Նիկոլ Փաշինյանը հանդես է եկել ԱԺ արտահերթ նիստ անցկացնելու նախաձեռնությամբ: Նախաձեռնությունը ստորագրել են շատ քիչ թվով պատգամավորներ՝ 9 պատգամավոր անհրաժեշտ 44-ից: Մասնավորապես, ԱԺ ՀՀԿ և ԲՀԿ խմբակցություններից որևէ պատգամավոր չի ստորագրել:
«Այդ նիստն առաջին հերթին անհրաժեշտ է ՀՀԿ-ի համար, ընդդիմության համար այդպիսի անհրաժեշտություն չկա»,- «Առաջին լրատվական»-ի հետ զրույցում ասաց «Նոր Հայաստան» հանրային փրկության ճակատի քաղխորհրդի անդամ Անդրիաս Ղուկասյանը:
Մեր զրուցակցի խոսքով՝ ՀՀԿ-ն պետք է հեռացվի կառավարությունից, և դա նրանց վերջին հնարավորությունն է՝ հանրությանը ցույց տալու, որ իրենց մեջ դեռ ներուժ կա դրսևորել ճգնաժամային իրավիճակից դուրս գալու տեսլական. «Եթե ասելիք չունեն, ուրեմն հանրությանն ընդհանրապես պետք չեն»:
Ինչպես նշեց Անդրիաս Ղուկասյանը՝ հանրությունը արտահայտել է այս ապստամբության նկատմամբ իր դիրքորոշումը. «Այսինքն՝ հանրային կարծիքի արտահայտման փուլն ավարտված է: Իսկ վերջին 2 օրվա դեպքերը ցույց տվեցին, որ բանակցություններ այլևս չեն կարող լինել, մերժվել է հանրության՝ արյունահեղություն թույլ չտալու պահանջը: Հասկանալի է, որ քրեական ռեժիմը գնում է բախման՝ անտեսելով հանրային կարծիքը»:
Մեր զրուցակիցը տեղեկացրեց, որ այժմ պետք է փոխվի ռազմավարությունը, փոխվել է նաև համակարգող խորհրդի կազմը:
Իսկ թե ինչու համակարգող խորհուրդը լքեց Խորենացու հարթակը, որից հետո վիրավորվեցին Պավլիկ Մանուկյանն ու նրա որդին, Անդրիաս Ղուկասյանը այսպես բացատրեց. «Ալեք Ենիգոմշյանը ճիշտ որոշում կայացրեց, որովհետև վարչախմբի սադրիչ գործողությունները տանում էին բախման, իսկ քաղաքացիական անձանց շրջանում ցանկացած զոհի համար ռեժիմը մեղադրելու էր «Սասնա ծռերին»: Այդպիսին էր սցենարը»:
Մանրամասները՝ տեսանյութում: