ԱԺ պատգամավոր Նիկոլ Փաշինյանը նախաձեռնել է այսօր, ժամը 17.00-ին, Ազգային ժողովում հրավիրել արտահերթ նիստ՝ քննարկելու Հայաստանում ստեղծված իրավիճակը: Նիստը գումարելու համար անհրաժեշտ է 44 ստորագրություն, սակայն այս պահի դրությամբ ստորագրել է 9 պատգամավոր և անհրաժեշտ է ևս 35 պատգամավորի ստորագրություն:
Պատգամավորների կողմից այս նախաձեռնությանը չարձագանքելու պատճառը քաղաքական վերլուծաբան Հակոբ Բադալյանը համարում է այն, որ իշխանության օրակարգում չկա այդպիսի նիստ անցկացնելու խնդիր, թեև փոփոխությունների պահը վաղուց էր հասունացել՝ առնվազն ապրիլյան պատերազմից հետո:
Նրա խոսքով՝ իշխանությունը լոկալիզացրել է ՊՊԾ գնդի գրավման առիթը, և փողոցն ու այդ առիթը ինչ-որ իմաստով կտրված են, ուստի դրանք իշխանության համար պատճառ չեն՝ փոխելու իր մարտավարությունը:
«Մեր իշխանությունը ոչ սահմանադրական ճանապարհով ձևավորված իշխանություն է, ուստի կգերագնահատենք՝ խոսելով սահմանադրական մեխանիզմների աշխատանքի մասին. եթե իշխանությունը պատրաստ լիներ դրան, վաղուց կաշխատեցներ այդ մեխանիզմները և կփոփոխեր իրավիճակը, ուրեմն իշխանությունը պիտի ստիպված լինի այդ փոփոխություններին գնալու համար»,- «Առաջին լրատվական»-ի հետ զրույցում ասաց Հակոբ Բադալյանը՝ նշելով, որ հասարակությունը չունի այն գործոնը, որը իշխանությանը կմղի այդպիսի քայլերի:
Քաղաքական վերլուծաբանի խոսքով՝ ստեղծվել է փակուղային վիճակ, և ինչպես միշտ Հայաստանում՝ կա հաջորդ քայլի խնդիր, որի առանցքում պետք է լինի որևէ բովանդակություն, որևէ օրակարգ. ««Սասնա ծռերի» դեմ գրոհ չի լինում ոչ թե հանրային պրոցեսների, այլ գրոհի անիմաստության կամ արյունահեղության մեծ վտանգի պատճառով»:
Հարցին՝ սպառվե՞լ էին արդյոք փոփոխությունների հասնելու քաղաքական մեթոդները, քաղաքական վերլուծաբանը պատասխանեց. «Հայաստանում կա ոչ թե քաղաքական մեթոդների սպառվածության խնդիր, այլ այդ մեթոդները մշակող մարդկանց, խմբերի, առաջնորդողների խնդիր: Եվ ստեղծված իրավիճակը ավելի շատ մարտահրավեր է քաղաքական ուժերի համար»:
Մանրամասները՝ տեսանյութում:
