«Հայաստանի իշխանությունները զանգվածային հավաքների նկատմամբ «հանդուրժողական» վերաբերմունք են ցուցաբերում այնքան ժամանակ՝ մինչև զգում են, որ դա իրոք կարող է ռեալ քաղաքական գործընթացի վերաճել»,- Խորենացու փողոցից անխտիր բոլորին, այդ թվում նաև անչափահասներին, բերման ենթարկելու փաստի առնչությամբ լրագրողների հետ զրույցում ասաց ԱԺ պատգամավոր Նիկոլ Փաշինյանը:
Պատգամավորի խոսքով՝ տեղի են ունենում ապօրինի գործողություններ, «որովհետև ինչ է նշանակում հազարավոր քաղաքացիների մեղադրել ապօրինի հավաքի մասնակցելու մեջ: Հայաստանի օրենքներով՝ ապօրինի հավաք հասկացություն գոյություն չունի: Մարդիկ ինքնաբուխ կարող են հավաքվել: Իսկ այս հավաքները ինքնաբուխ են, չունեն կազմակերպիչներ»:
Նիկոլ Փաշինյանի խոսքով՝ վաղը ժամը 17.00-ին ցանկանում են գումարել Ազգային ժողովի արտահերթ նստաշրջան՝ ստեղծված իրավիճակը քննարկելու համար, ինչի համար անհրաժեշտ է առնվազն 44 պատգամավորի ստորագրություն:
