«Այստեղ կարևոր է, թե ինչ մտադրությամբ են նրանց զրկել ազատությունից: Նախևառաջ դա տեղաշարժի ազատության սահմանափակում է, երկրորդ՝ հնարավոր է, որ դա ազատությունից զրկելու հանգամանք է, և երրորդ՝ հնարավոր է, որ պատանդ լինի: Դա արդեն կախված է, թե նրանք ինչ պատճառաբանություն կներկայացնեն: Մինչև հիմա ներկայացված պատճառաբանությունն այն է, որ իրենք ուզում են և պահանջում են տեղում բուժում իրականացնել: Հիմա եթե այդ անձանց պահելով հանդերձ շարունակեն պահանջներ ներկայացնել իշխանություններին, սա տանում է պատանդի դաշտ, ավելին՝ կարող է նույնիսկ 217-րդ հոդվածի դաշտ տանել, այսինքն՝ ահաբեկչական գործողություն ընդդեմ քաղաքացիական անձի:
Կրկնում եմ՝ դեռ վաղ է այդ մասին խոսելը: Սա, իմ կարծիքով, պատանդ պահելու գործելակերպ է, որպեսզի բժիշկները իրենց մոտ իրականացնեն այդ անձանց բժշկական միջամտությունը»՝ անդրադառնալով ՊՊԾ գունդը գրաված զինված խմբի կողմից բուժաշխատողներին պատանդ վերցնելուն՝ «Առաջին լրատվական»-ի հետ զրույցում ասաց միջազգային իրավունքի մասնագետ Արա Ղազարյանը:
Նրա խոսքով՝ ակնհայտ է մի բան. այդ մարդիկ իրենց դրել են օրենքի դաշտից դուրս, և այստեղ ոստիկանության կողմից առավել կոշտ միջամտության համար ավելի ու ավելի շատ հիմքեր են առաջ գալիս:
Արմենակ Կյուրեղյանը հայտարարել է, թե ոստիկանները Պավլիկ Մանուկյանի վրա կրակել են վիրավոր ապստամբին հանձնելու ժամանակ. արդյոք սա պայմանավորվածության խախտում չէ: Արա Ղազարյանն այս կապակցությամբ ասել է, որ մի բան է պարզ, որ նրանց գործողություններն անօրինական են, քանի դեռ նրանք զենք են կրում և չեն կարող խոսել ոստիկանների կողմից ինչ-ինչ անօրինական գործողությունների մասին:
«Ի սկզբանե ոստիկանների գործողություններն օրինական են, նրանց գործողությունները՝ անօրինական: Ոստիկանները կարող են ուժ կիրառել ցանկացած պահի, քանի դեռ այդ հանցագործությունները շարունակվում են: Այդ տեսակի հանցագործությունը զենք-զինամթերք պահելը, կրելը կիրառելն է, և երկրորդ՝ շենք, շինություն զավթելը, ինչը շարունակվում է արդեն 10 օր»,- ասել է նա:
Հարցին ի պատասխան՝ եթե գրոհ տեղի ունենա, ո՞վ է պատասխանատվություն կրելու, միջազգային իրավունքի մասնագետը նկատեց. «Եթե գրոհ տեղի ունեցավ և, ենթադրենք, եղավ մարմնական ծանր վնասվածք կամ զոհ, սկզբունքորեն պատասխանատվություն են կրում այն անձինք, ովքեր հարձակվել են գնդի վրա»:
Հիշեցնենք, որ իրենց մասնագիտական պարտականությունները կատարելիս «Սասնա ծռեր» խմբի կողմից պատանդ են վերցվել բժիշկներ Նորայր Թևանյանն ու Սալվադոր Չեխոյանը, բուժեղբայր Դավիթ Տոնոյանը և բուժքույր Մալինա Մարգարյանը։
