Թուրքական Milliyet թերթի փոխանցմամբ՝ իշխող «Արդարություն և զարգացում» կուսակցությունը (ԱԶԿ) ռազմական հեղաշրջման փորձից հետո սկսել է մասշտաբային քայլեր ձեռնարկել զինված ուժերի վերափոխման ուղղությամբ:
Այդ ամենը պետք է իրականացվի օրենսդրական ճանապարհով՝ սահմանադրական ուղղումների միջոցով: Արմատական փոփոխությունների կարող է ենթարկվել Թուրքիայի ռազմական դատարանների համակարգը:
Չի բացառվում, որ այն ընդհանրապես կարող է վերացվել: Նախատեսվում է ամբողջովին վերացնել այդ կառույցները և բանակում թողնել միայն կարգապահական դատարանները, որոնք բացառապես կզբաղվեն գործող զինծառայողների կանոնադրության խախտումների հարցով:
Զինվորականների հետ կապված՝ մնացյալ բոլոր հարցերը դիտարկվելու են քաղաքացիական դատարանների կողմից: Մեկ այլ տարբերակի համաձայն՝ Գլխավոր շտաբը կպահպանի իր տրամադրության տակ ռազմական բոլոր դատական ատյանները, սակայն նրանք պետք է իրենց որոշումները համաձայնեցնեն Գերագույն դատարանի հետ:
