ՀՀ-ում Գերմանիայի դեսպան Մաթիաս Քիսլերը կարծում է, որ ՆԱՏՕ-ի ազդեցությունը Հարավային Կովկասի տարածաշրջանում, մասնավորապես ղարաբաղյան կարգավորման գործընթացում, կարող է սահմանափակ լինել:
«Իհարկե, ՆԱՏՕ-ի համար կարևորագույն խնդիրներ են մնում կայությունն և անվտանգությունը հարավում, արևելքում, անդամ և ոչ անդամ պետությունների դեպքում, սակայն այժմ հիմնական ուշադրությունը կենտրոնացված է արևելքում: ՆԱՏՕ-ն ունի գործընկերության ծրագրեր ոչ անդամ երկրների հետ, և Հայաստանը նույնպես այդ ծրագրերի անդամ է: Պետք է շեշտել, որ համագործակցությունը կլինի հաջող, եթե լինի երկկողմանի շահագրգռվածություն: ՆԱՏՕ-ն միանշանակ հաշվի է առնում գործընկեր երկրների շահերը, այստեղ ամեն ինչ արդեն կախված է Հայաստանից, թե նա ինչպես կձևակերպի իր կարիքները և ինչպես կներկայացնի ՆԱՏՕ-ին»,- ասել է դեսպանը:
Անդրադառնալով Ռուսաստան-ՆԱՏՕ հարաբերություններին՝ նա նշել է, որ ՆԱՏՕ-ն չի կարող դիտվել որպես սպառնալիք Ռուսաստանի համար:
«ՆԱՏՕ-ն առաջին հերթին կենտրոնանալու է երկխոսություն հաստատելու հեռանկարների վրա»,-ընդգծել է Գերմանիայի դեսպանը:
Հուլիսի 8-9-ը Լեհաստանի մայրաքաղաք Վարշավայում կայացել է ՆԱՏՕ-ի գագաթնաժողովը, որին մասնակցել են Հյուսիսատլանտյան դաշինքի անդամ երկրների առաջնորդները`այդ թվում ԱՄՆ նախագահ Բարաք Օբաման: Արևմտյան պետությունների ղեկավարներից բացի գագաթնաժողովին մասնակցել են նաև դաշինքի հետ համագործակցող երկրների ղեկավարները, այդ թվում` ՀՀ նախագահ Սերժ Սարգսյանը:
