«Հիմնադիր խորհրդարան»-ի անդամ, ԱՍԱԼԱ-ի մարտիկ Ալեք Ենիգոմշյանը լրագրողների հետ զրույցում ներկայացնելով երեկ գիշերը տեղի ունեցածը՝ ասաց, որ զինված հարձակման արդյունքում վիրավորված Պավլիկ Մանուկյանն ու նրա որդին՝ Արամ Մանուկյանը, ծանր վիճակով գտնվում են հիվանդանոցում:
Նրա խոսքով՝ դա արդյունք էր քրեական հանցագործներին հարիր գործունեության. «Այդպիսի գործելաձևի չէին դիմել նույնիսկ ադրբեջանցի հակառակորդները Արցախյան ազատամարտի ընթացքում»:
Արեգ և Սերգեյ Կյուրեղյանների հայրը՝ Արմենակ Կյուրեղյանը, ներկայացնելով գիշերը տեղի ունեցածը՝ ասաց, որ ոչ մի գրոհ, օպերացիա տեղի չի ունեցել, այլ Պավլիկ Մանուկյանը փորձել է բանակցել ոստիկանության հետ, որպեսզի իրենց տրամադրեն բժիշկ՝ վիրավորին բուժելու. «Այդ ժամանակ ծանր գնդացրից կրակ է բացվել Պավել Մանուկյանի վրա, իսկ որդին տեսնելով դա՝ վազել է օգնության, որի վրա ևս կրակ են բացել»:
Այսինքն՝ այդ տղաները չեն հանձնվել, դա ապատեղեկատվություն է, ապատեղեկատվություն է նաև այն, թե զինյալները թույլ չեն տվել իրենց վիրավոր ընկերոջը օգնություն ցույց տալ՝ նշեց Արմենակ Կյուրեղյանը. «Ինձ թվում է՝ սա իրավիճակի միտումնավոր սրում է և Հայաստանը դեպի քաոս տանելու նպատակ ունի: Սկսվել է քարոզչական պատերազմ սեփական ժողովրդի դեմ և փորձ է արվում խաթարել «Սասնա ծռեր» խմբի տղաների բարոյական կերպարը: Ես ներողություն եմ խնդրում երիտասարդությունից իրենց այսպիսի երկիր ժառանգություն թողնելու համար»:
Ինչպես հայտնեց Ալեք Ենիգոմշյանը՝ ներսում գտնվող տղաները վճռական են, իսկ ոստիկանության հայտարարությունը, թե՝ տղաները պատանդ են վերցրել ներսում գտնվող բժշկին, սուտ է. «Տղաները պահանջում են, որ լինի բժշկական ծառայության հերթափոխ, որպեսզի ներսում գտնվող բժիշկը դուրս գա: Նրանք պահանջում են նաև, որ պատգամավորները ուժային կառույցներից պահանջեն հանդիպում տղաների հետ»:
Համակարգող խորհրդի կողմից Խորենացու հարթակը լքելու փաստը Ալեք Ենիգոմշյանը պատճառաբանեց այն հանգամանքով, որպեսզի չիրականանար վարչախմբի նպատակադրած սադրանքը՝ բախումը ժողովրդի հետ. «Ժողովրդի պայքարը շարունակվում է: Մենք մտնում ենք 2-րդ փուլ: Առաջին փուլը՝ «Սասնա ծռերի» քաղաքական լեգիտիմացման փուլը, ամբողջությամբ իրականացվել է»:
Մանրամասները՝ տեսանյութում: