Ադրբեջանական Trend լրատվական գործակալության փոխանցմամբ՝ «Իրանական երկաթուղիներ» ընկերության՝ միջազգային փոխադրումների հարցերով փոխնախագահ Հուսեին Աշուրին լրատվամիջոցի հետ զրույցում հայտարարել է, որ Ադրբեջանը լրջորեն է վերաբերվում «Հյուսիս-հարավ» տարանցիկ միջանցքի զարգացմանը:
Նրա խոսքով՝ Իրանի, Ռուսաստանի ու Ադրբեջանի ներկայացուցիչներն ամեն ամիս անցկացնում են հանդիպումներ՝ քննարկելու համար «Հյուսիս-հարավ» միջանցքի նախագծի զարգացման հարցը, որում Բաքուն առանցքային դեր է խաղում:
«Թեհրանն ու Դելին այս տարի երկու խորհրդակցություն են անցկացրել նշված երթուղուն Հնդկաստանի միանալու հարցով: Այսօր մենք կցանկանայինք յուրացնել տարանցման կոմբինացման համակարգը:
Հնդկաստանից Ռուսաստան փորձնական առաջին բեռը Իրանի ու Ադրբեջանի տարածքների տարանցմամբ կհասցվի օգոստոսին: Բեռը Հնդկաստանից կուղարկվի Պարսից ծոցի ափին գտնվող Բենդեր Աբասի նավահանգիստ, որտեղից էլ երկաթուղով այն կհասցվի Ղազվին, ապա ավտոտրանսպորտով կհասցվի Իրանի սահմանի մոտ ընկած ադրբեջանական Աստարա:
Վերջնական արդյունքում բեռն Ադրբեջանից Ռուսաստան կհասցվի երկաթուղային ճանապարհով: Ներկայումս մնացել է կառուցել «Հյուսիս-հարավ» տրանսպորտային միջանցքի մի մասը՝ Ռեշտ-Աստարա երկաթուղային հատվածը»:
