ԱՄՆ նախկին պետքարտուղար Հիլարի Քլինթոնի՝ նախագահ ընտրվելու դեպքում նրա ամուսինը՝ Բիլ Քլինթոնը, չի կարողանա ներկա լինել հանդիպումներին և ժողովներին Սպիտակ տանը և առավելագույնս զրկված կլինի իր կնոջ որոշումների վրա ազդելու հնարավորությունից: Այս մասին գրում է The New York Times-ը՝ հղում անելով երկրի ղեկավարի պաշտոնի թեկնածուի խորհրդականներին:
Պարբերականի տեղեկությամբ՝ ԱՄՆ նախկին նախագահ Բիլ Քլինթոնին այլևս չեն հրավիրի Սպիտակ տանը կառավարության անդամների նիստերին և խորհրդակցություններին: Բացի դրանից՝ նրան առանձին աշխատանքային տարածք չեն տրամադրի շենքի արևմտյան թևում, որտեղ գտնվում է երկրի ղեկավարի Օվալաձև աշխատասենյակը:
«Գործող և նախկին նախագահների փոխհարաբերությունները շատ նրբանկատ հարց կլինեն»,- կարծում է ԱՄՆ մի շարք նախագահների օրոք խորհրդական Դևիդ Ջերգենը:
Ըստ նրա՝ Քլինթոնը կուզենա նորից գրել իր նախագահության պատմությունը՝ ազդելով ամուսնու վրա: