Դաշնային շրջանային դատարանը Սան Ֆրանցիսկոյում նախապես հաստատել է դիզելային սկանդալի շրջանակներում որպես փոխհատուցում Volkswagen ընկերության կողմից 14,7 մլրդ դոլար վճարելու որոշումը: Այս մասին հայտնում է BBC-ի ռուսական ծառայությունը:
Փոխհատուցումները կվճարվեն Volkswagen ավտոմեքենաների գնորդներին, որոնց վրա եղել է վնասակար նյութերի արտանետումների իրական ցուցանիշները նվազեցնող ծրագրային ապահովում:
Դատավոր Չարլզ Բրեյերը հայտարարել է, որ այդ հարցով վերջնական որոշում կընդունվի հոկտեմբերի 18-ին:
Volkswagen-ը սկանդալի կենտրոնում է հայտնվել մեքենաների վրա ծրագրային ապահովման հայտնաբերումից հետո, որը թույլ է տալիս շրջանցել ԱՄՆ էկոլոգիական խիստ նորմերը:
ԱՄՆ իշխանությունները Volkswagen-ին պարտադրել են հետ կանչել 2009-2015 թթ. ամերիկյան շուկա հանված մոտ կես մլն ավտոմեքենա:
Ընկերության տվյալներով՝ թեստավորման արդյունքների կեղծումը վերաբերել է դիզելային շարժիչով 11 մլն մեքենայի ամբողջ աշխարհում: