Մինչև Իրանի շահերը Կասպից ծովի իրավական կարգավիճակի որոշման հարցում առավելագույնս ապահովված չլինեն, Իրանը ծովի բաժանման ոչ մի տարբերակի հետ չի համաձայնի. այս մասին, իրանական գործակալությունների փոխանցմամբ, տեղեկացրել է Իրանի ԱԳՆ խոսնակ Ռամին Մեհմանփարաստը: Լրագրողի այն հարցին, թե ծովի իրավական կարգավիճակի որոշման արդյունքում, հնարավո՞ր է՝ Իրանի 20 տոկոս շահույթը նվազի, Ռամին Մեհմանփարաստը պատասխանել է, որ Կասպից ծովի իրավական կարգավիճակի որոշման շուրջ կազմակերպվող հավաքներն այն նպատակով են հրավիրվում, որ վերջնական որոշումը ընդունվի բոլոր հինգ երկրների համաձայնությամբ:
Իրանցի դիվանագետը նշել է, որ հարցերի մոտ 70 տոկոսի շուրջ կողմերը եկել են համաձայնության, սակայն շատ կարևոր են նաև մնացյալ չհամաձայնեցված խնդիրները, որոնք գուցե թե մեծ ազդեցություն կունենան վերջնական որոշման վրա:
Անդրադառնալով Կասպից ծովի բաժանման խնդրին` Իրանի ԱԳՆ խոսնակը նշել է, որ այդ հարցը լուծելիս հաշվի են առնվում գիտական մեթոդները և այն հանգամանքը, թե նախկինում նմանատիպ ջրային սահմանային խնդիրներն ինչպես են հանգուցալուծվել: «Ծովի վերջնական կարգավիճակի որոշման արդյունքում, հնարավոր է, որ որևէ երկրի շահույթն ավելանա կամ նվազի, սակայն այդ հարցը ևս պետք է համաձայնվեցվի բոլոր 5 երկրների` Իրանի, Ռուսաստանի, Ադրբեջանի, Թուրքմենստանի և Ղազախստանի կողմից»,- նշել է Մեհմանփարաստը: