Չորեքշաբթի սկսվում է Հռոմի պապ Ֆրանցիսկոսի 5-օրյա առաքելական ուղևորությունը Լեհաստան Կաթոլիկ երիտասարդության համաշխարհային օրվա կապակցությամբ, որն այս տարի անցկացվում է Կրակովում: Այս մասին հայտնում է RIA Novosti-ն:
Հռոմի պապի ինքնաթիռի թռիչքը նախատեսվում է 14:00-ին (մեր ժամանակով՝ 16:00) Հռոմի Ֆյումիչինո միջազգային օդանավակայանից: Այցի ծրագրով նախատեսված բոլոր միջոցառումներում նա կօգտվի իր ավանդական «պապամոբիլից», զրահապատ ավտոմեքենաներով երթևեկություն չի նախատեսվում:
Հռոմի պապը Կրակով կժամանի տեղի ժամանակով ցերեկվա ժամը ժամը 4-ին: Ծրագրված է նրա հանդիպումը Լեհաստանի նախագահ Անջեյ Դուդայի և լեհ եպիսկոպոսների հետ:
Հուլիսի 28-ին Ֆրանցիսկոս պապը կայցելի Յասնա Գուրա վանք, որտեղ գտնվում են լեհերի համար սուրբ կաթոլիկ սրբավայրեր: Վանքում ժամերգություն կանցկացվի Լեհաստանի՝ որպես պետություն կազմավորման՝ այս տարի նշվող 1050-ամյակի պատվին: Երեկոյան Հռոմի պապը Կրակով կվերադառնա, որտեղ նրան կշնորհվեն քաղաքի խորհրդանշական բանալիները:
Հուլիսի 29-ին Հռոմի պապը կայցելի Օսվենցիմում նացիստական նախկին համակենտրոնացման ճամբարի տեղում գործող թանգարան: Օրվա երկրորդ կեսին նա կվերադառնա Կրակով, որտեղ կհանդիպի համալսարանական մանկական հիվանդանոցի հիվանդների հետ, հետո երթ կկատարի երիտասարդության հետ:
Հաջորդ օրը Ֆրանցիսկոս պապը կմեկնի Աստծո ողորմածության սրբավայր Լագևնիկիում: Ծրագրվում է, որ նա կլսի երիտասարդների խոստովանությունը և ժամերգություն կանցկացնի Հովհաննես Պողոս II-ի սրբավայրում:
Այցի ավարտին՝ հուլիսի 31-ին, Հռոմի պապը ուղերձով կդիմի հավատացյալներին և կհանդիպի կամավորների հետ, որոնք օգնել են միջոցառումների կազմակերպման և անցկացման գործում: Նույն օրվա երեկոյան նա կվերադառնա Վատիկան:
