ԱՄՆ Դեմոկրատական կուսակցության համագումարի՝ սենատոր Բերնի Սանդերսի կողմնակից պատվիրակները պահանջում են փոխել երկրում ընտրությունների կանոնները և հեռացնել օլիգարխներին քաղաքականությունից։ Այս մասին հայտնում է RIA Novosti-ն։
Երեքշաբթի կուսացության համագումարում, որն անցկացվում է Ֆիլադելֆիայւմ, նախկին պետքարտուղար Հիլարի Քլինթոնը հաստատվել է ԱՄՆ նախագահի թեկնածու։ Նրա նախկին մրցակից Սանդերսն աջակցել է այդ որոշմանը։ Չնայած նրան, որ Քլինթոնի առաջադրումը միայն ձևականություն է եղել, սենատորի շատ կողմնակիցներ լքել են նիստը՝ ի նշան բողոքի, և ակցիա են անցկացրել մամլո կենտրոնում։ Շատերը սոսնձել են իրենց բերանները՝ ակնարկելով, որ կուսակցության ղեկավարությունը չլսեց ժողովրդի ընտրյալների ձայները։
Նրանց հիմնական պահանջի էությունը, այսպես կոչված, «սուպերպատվիրակների» վերացման պահանջն է, ովքեր կուսակցական ղեկավարության ներկայացուցիչներ են տեղերում և կարող են քվեարկել համագումարում իրենց հայեցողությամբ, այլ ոչ թե ընտրողների կամքով, ինչպես սովորական պատվիրակները։
Քլինթոնը համագումարից առաջ ստացել է նման «սուպերպատվիրակների» ճնշող թվի (591) աջակցություն, առանց որոնց չէր կարող հասնել առաջադրման։
«Մենք պետք է ազատվենք նրանցից (սուպերպատվիրակներից)։ Մի՞թե դա ժողովրդավարություն է։ Ինչի՞ համար են նրանք մեզ պետք»,- ասել է պատվիրակ Ջեննա Հարիսը։
Նրա խոսքով՝ պետք է այնպիսի համակարգ, երբ ցանկացած օրենսդիր կամ պաշտոնյա պատասխան կտա իր ընտրողների առջև, հակառակ դեպքում կլքի պաշտոնը։
Սանդերսի կողմնակիցները մտադիր են Քլինթոնից պահանջել բոլոր նախընտրական խոստումների կատարում։