«Սոցիալական արդարություն» ՀԿ ղեկավար, քրեական արդարադատության հոգեբան Արշակ Գասպարյանը «Սասնա ծռեր» խմբի զինյալների գործողությունները դիտարկելով զուտ քրեական արդարադատության տեսակետից՝ «Առաջին լրատվական»-ի հետ զրույցում ասաց. «Պետական մարմինը վերջերս արդեն որակել էր. դիտարկվել էին թե զենք կրելու, թե շենք-շինություն զավթելու քր.օր.-ի բոլոր հոդվածները, և Ազգային անվտանգությունը այդ հոդվածներով արդեն ենթադրեց, որ կա նմանատիպ հանցակազմ»:
Մեր զրուցակցի խոսքով՝ «ահաբեկիչ» տերմինը պետք է մի քիչ զգույշ արտաբերվի, որովհետև «ես դեռ չեմ հիշում, որ ահաբեկիչներին պետությունը սնունդ մատակարարի»:
Զերծ մնալով իրավական գնահատականներից՝ մեր զրուցակիցը նկատեց, որ կատարվել է գործողություն, որը ֆորմալ առումով կարող է ունենալ հանցակազմ՝ կարևորելով, սակայն, քաղաքացիների վերաբերմունքը այդ տղաների նկատմամբ. «Հոգեբանական տեսակետից ևս մենք տարբեր շերտեր ենք խառնում այս ամենին. ովքեր են Մանուկյան Պավլիկենք, նախագահի հրաժարականը, կառավարման համակարգը և վերջում միացնում ենք նաև Ղարաբաղի հողերը հետ չտալու հարցը»:
Արշակ Գասպարյանը վստահ է, որ սա մեկ օրվա քայլ չէր, այլ սկսվել է 90-ական թվականներից՝ ԼՂ պատերազմ, որում ըստ էության հաղթեցինք, բայց դե յուրե չհաղթեցինք, 88-ի երկրաշարժ, 96թ. սեպտեմբեր, 99-ի Հոկտեմբերի 27. «Այս ամենը սթրեսածին գործոններ են, որոնք թույլ չեն տալիս իրացնել մարդու պահանջմունքները, և մարդու մոտ առաջանում է դիմադրություն»:
«Այն, ինչ արեցին այս տղաները, իհարկե լավագույն միջոցը չէ (դա իրենք՝ տղաներն էլ են ընդունում), բայց ինչ-որ մարդկանց ընկալմամբ՝ անելանելի իրավիճակից դուրս գալու ձև է»,- ասաց նա՝ հավելելով, որ Հայաստանում արդարադատություն գոյություն չունի, ուստի անիմաստ է խոսել անպատժելիության մասին:
Մեր զրուցակցի կարծիքով՝ ագրեսիվ պահվածքի պատճառ է նաև այն, որ հասարակությունը չունի սպառիչ տեղեկատվություն՝ ինչպես մտան, ինչպես եկան, ինչու արեցին… Իսկ տղաների կողմից ոստիկանության մեքենա այրելու փաստը նա համարում է հասարակության համախմբմանն ուղղված գործիք:
«Այս ամենում թիվ մեկ շահը պետք է լինի զոհ չունենալը, այդ թվում նաև՝ ոստիկանության շրջանում»,- ասաց Արշակ Գասպարյանը՝ չբացառելով հանգուցալուծման որևէ տարբերակ և նշելով, որ կոտրվեց քաղաքացու նկատմամբ պետության ուժեղ լինելու ընկալումը. «Անկախ նրանից, թե սա ինչպես կավարտվի, սա դեռ ավարտը չէ»:
Արշակ Գասպարյանը համարում է, որ ԱԱԾ հայտարարության մեջ կան եթե չասենք՝ վերջնագրային, ապա համոզելու շեշտադրումներ: