Երևանում իրավիճակը գնալով սրվում է՝ «Սասնա ծռեր» խմբի անդամների և ոստիկանության միջև տեղի է ունեցել փոխհրաձգություն, խմբի անդամներից կան 2 վիրավորներ:
Գնահատելով այս լարված իրավիճակը՝ Պահպանողական կուսակցության նախագահ Միքայել Հայրապետյանը «Առաջին լրատվական»-ի հետ զրույցում ասաց. «Կարելի է ասել, թե ովքեր են շահագրգռված, ում է ձեռնտու ցանկացած խռովություն, խժդժություն մեր երկրում, երբ ներկա պահին Հայաստանի շուրջն ամեն ինչ եռում է, երբ Ռուսաստանը կամենում է Ադրբեջանին ներքաշել Եվրասիական միության մեջ, որի գինը պետք է մենք վճարենք՝ մեր հայրենիքի վիրավոր հատվածով՝ Արցախով»:
Նրա խոսքով՝ այս ամենը, բնականաբար, ձեռնտու է Ռուսաստանին, ուստի արևմտյան կենտրոնները, ԱՄՆ-ը, ԵՄ-ն իրենց հայտարարություններում նշեցին խաղաղ հանգուցալուծման, օրենքի շրջանակներում շարժվելու անհրաժեշտության մասին. «Մինչդեռ Ռուսաստանը կրակի վրա յուղ է լցնում»:
Ինչպես նշեց պարոն Հայրապետյանը՝ միակ բանը, որ կարող են անել զինյալները, հանրայնացնելն է իրենց ձեռքին եղած գործակալների, «ստուկաչների» ցուցակները, քանի դեռ ուշ չէ. «Սա շատ կարևոր է, որպեսզի հասարակությունն իր տականքին ճանաչի և այդքանով պաշտպանված լինի: Ստեղծվել է լյուստրացիայի հրաշալի հնարավորություն»:
Մեր զրուցակցի համոզմամբ՝ իշխանությունները ոչ միայն այս մասին գիտեն, այլև զինյալ հարձակման մասին պիտի իմանային. «Հակառակ դեպքում ուրեմն որքան ողորմելի վիճակում է հայտնվել մեր պետականությունը: Քառօրյա պատերազմը ցույց տվեց, որ մենք չունենք մեր երազած բանակը, այս հարձակմամբ Ռուսաստանը ցույց տվեց, որ մենք չունենք նաև զինված ուժերի մյուս հատվածը՝ ոստիկանություն՝ մեխին խփելով զինապահեստները: Չունենք նաև ազգային անվտանգություն, այլապես 30 հոգի հայտնվում են այդտեղ, և ազգային անվտանգությունը տեղյակ չի՞ լինում»:
Միքայել Հայրապետյանի կարծիքով՝ այս ամենը նշանակում է, որ Հայաստանը ղեկավարում են ոչ թե այսօրվա իշխանությունները, այլ նրանց այստեղ նշանակած անձինք: Սրանով Ռուսաստանն ասում է՝ «եկեք համաձայնեք մեր ծրագրին, այլապես պատերազմ կլինի Ադրբեջանի հետ»:
«Այժմ նյարդերի և ողջախոհության պատերազմ է»,- ընդգծեց նա:
Այնուամենայնիվ, Միքայել Հայրապետյանը բացարձակապես չի կասկածում «Սասնա ծռերի» հայրենասիրությանը. «Այստեղ խնդիրը քաղաքական հասունության մեջ է, թե՝ արդյոք նրանք գիտե՞ն ինչ են անում: Քրիստոսն էլ ասաց՝ Տեր, ներիր այս մարդկանց, քանզի չգիտեն՝ ինչ են անում»:
Մանրամասները՝ տեսանյութում: