Կառավարման փորձագետ Հարություն Մեսրոբյանը «Առաջին լրատվական»-ի հետ զրույցում անդրադառնալով հարցին, թե՝ այսօր Հայաստանում ստեղծված իրավիճակի ֆոնին արդյո՞ք մենք չունենք կառավարման լուրջ ճգնաժամ, ասաց. «Երբ 1991 թվականին մենք ստեղծեցինք Հայաստանի Հանրապետությունը, այն մոտեցումները, որոնք ներդրվել են այդ պետության մեջ՝ պետական կառավարման իմաստով, հղի են ճգնաժամերով»:
Մեր զրուցակցի խոսքով՝ այդ ժամանակ թույլ տրվեց երկու կոպիտ սխալ. առաջին՝ ներդրվեց ոչ արդյունավետ կառավարման պետական համակարգ, երկրորդ՝ ցուցաբերվեց շատ սխալ մոտեցում կադրերի մասով՝ սկսվեց արժանիների ճգնաժամ. «Այդ մոտեցումը գիտության մեջ կոչվում է կակոկրատական կառավարման համակարգ: Այսինքն՝ եղավ կրկնակի ռումբի էֆեկտ՝ և՛ կառավարման համակարգն էր անարդյունավետ, և՛ ներսում գտնվող մարդիկ: Այդ մոտեցումը տարածվեց ամբողջ Հայաստանով մեկ, ընդ որում՝ և՛ իշխանության, և՛ ընդդիմության մեջ, և՛ նույնիսկ բիզնես-ոլորտում: Այսինքն՝ սա մեզ մոտ մասշտաբային արատ է»:
Փորձագետը բացի այս ամենից՝ ստեղծված ճգնաժամային իրավիճակի պատճառներից է համարում նաև այն, որ մեզ մոտ չի աշխատում ֆիդբեկը՝ հետադարձ կապը, ինչի արդյունքում տարիների ընթացքում խնդիրները կուտակվում են, քանակը դառնում է որակ, և իրավիճակն ավելի է վատթարանում:
Ճգնաժամային իրավիճակի հաջորդ պատճառն այն է, որ «մենք ընդհանրապես չենք գնահատում մասնագետներին: Մենք ականջալուր չենք լինում այն մարդկանց, ովքեր գիտեն, թե ինչպես պետք է լուծվեն խնդիրները: Եվ ի վերջո՝ մենք ընդհանրապես ոչ մի բանի չափ ու սահման չունենք: Ուստի այս պայմաններում համակարգը հղի է ճգնաժամերով»:
Մանրամասները՝ տեսանյութում: