Ինչպես հայտարարվել էր երեկ երեկոյան, առավոտյան ժամը 9-ին քաղաքացիները պետք է սնունդ բերեին ՊՊԾ գունդը գրաված «Սասնա ծռեր» խմբի անդամների համար, որը նրանց պետք է փոխանցվեր ԱԺ «Ժառանգություն» խմբակցության անդամ Զարուհի Փոստանջյանի միջոցով:
Ինչպես «Առաջին լրատվական»-ի հետ զրույցում տեղեկացրեց Զարուհի Փոստանջյանը՝ սնունդը բերված է, բայց իրենց բարձրացրած հարցերը, այդ թվում՝ բերված սնունդը տղաներին փոխանցելու վերաբերյալ, մնում են անպատասխան:
Անդրադառնալով այս հարցի հանգուցալուծմանը՝ Զարուհի Փոստանջյանն ասաց. «Արձանագրված է, որ մինչ այս պահը ոստիկանությունը գործում է օրենքից դուրս: Միանշանակ է, որ հանգուցալուծումը լինելու է Սերժ Սարգսյանի հեռացումը, որովհետև ինքն է այսօր այն մահաբեր վտանգը, որը սպառնում է հայ ժողովրդին: Արևելյան սահմանի առաջին գիծն այսօր տեղափոխված է Երևան քաղաք, և այսօր ներքին թշնամին ավելի վտանգավոր է»:
Մեր զրուցակցի խոսքով՝ համաշխարհաին փորձը ցույց է տալիս, որ բոլոր բռնապետները հեռանում են. «Ես կցանկանայի, որ նա (Սերժ Սարգսյանը) հեռանար առանց արյան, առանց այն էլ ինքը մեղսակից է մեծ արյան»:
Ինչ վերաբերում է ՊՊԾ գնդում տեղի ունեցած միջադեպին և երկու ապստամբների վիրավորվելու մասին լուրին, Զարուհի Փոստանջյանն ասաց, որ ինքն այդ մասին տեղեկություններ չունի:
Մանրամասները՝ տեսանյութում: