«Ստեղծված վիճակի պատճառը իշխանության մոնոպոլիզացիան է, մենաշնորհացումը, կլանայնությունը, կոռուպցիան, որոնց հետևանքները ազդում են ՀՀ բոլոր քաղաքացիների վրա։ Դրանք փոխկապակցված են»,-«Առաջին լրատվական»-ի հետ զրույցում ասաց գրող, հրապարակախոս Վահրամ Մարտիրոսյանը։ Նրա խոսքով, եթե քրեական գործեր են հարուցվում զինված խմբի անդամների դեմ շենք շինություններ գրավելու համար, ապա պետք է քրեական գործ հարուցվի նաև ՀՀ իշխանությունների դեմ իր երկրի քաղաքացիներին ինքնասպանության դրդելու համար։ «Սասնա ծռերի խումբի անդամները գնացել են գիտակցված մահվան, որը ինքնասպանության ձևերից մեկն է։ Հետևաբար պետք է քրեական գործ հարուցել իշխանության ներկայացուցիչների դեմ մարդկանց այդ արարքին դրդելու համար»,-հավելեց հրապարակախոսը։
Նրա խոսքով այս իրավիճակը ստեղծվեց, քանի որ երկրում այլընտրանք չկա։ Կա մեկ կուսակցություն՝ տարբեր անուններով, քրեաօլիգարխիկ համակարգ, կողծված ընտրություններ, որը լցրել է ժողովրդի համբերության բաժակը։ «Հասկանալի է, որ իշխանությունը փոխելու խաղաղ տարբերակ չկա, հասկանալի է, որ պետք է լինի նման ծայրահեղ տարբերակ։ Սա առաջ է գալիս այն պարագայում, երբ բոլոր միջոցները սպառված են»,-նկատեց Մարտիրոսյանը՝ հավելելով, որ ստեղծված վիճակին էականորեն նպաստեց նաև այն հանգամանքը, որը ստեղծվել էր ապրիլյան պատերազմի օրերին, երբ ակնհայտ դարձավ, որ Հայաստանը ծայրահեղ անպատրաստ վիճակում էր։
Առավել մանրամասն՝ տեսանյութում