Գերմանական Der Spiegel թերթի փոխանցմամբ՝ ռազմական հեղաշրջման տապալումից հետո Թուրքիայի իշխանությունների ձեռնարկած կոշտ միջոցները լուրջ ռիսկեր են պարունակում երկրի տնտեսության համար։
Հենց դա է Էրդողանի «աքիլլեսյան գարշապարը»։ Թուրքիայի խնդիրը կայանում է նրանում, որ նա կախված է օտար կապիտալից։ Դրա համար էլ Էրդողանի իշխանությունը կարիք ունի օտար ներդրողների վստահությունը շահելուն, ինչը խաթարվել է, երբ պետական հեղաշրջման ձախողումից հետո Թուրքիայի իշխանությունները ցուցաբերել են չափազանց կոշտ արձագանք։
Բորսաներն արդեն իսկ բացասաբար են արձագանքել այդ իրադարձություններին, լիրայի փոխարժեքը նվազում է, ռեզերվները կրճատվում են, Standard & Poor’s գործակալությունը նվազեցրել է Թուրքիայի վարկունակության վարկանիշը։
Թերթն ընդգծում է, որ որքան շատ Էրդողանը սահմանափակի ազատությունը երկրում, այնքան կմթագնվեն տնտեսական աճի հեռանկարները և այնքան վատ կլինեն իրենց փողերը վերադարձնելու ներդրողների հնարավորությունները։
Թերթը նշել է, որ Թուրքիայում հնարավոր են երկու սցենարներ։ Եթե երկրի իշխանությունները որդեգրեն ավելի մեղմ դիրքորոշում, ապա հավանաբար ամեն ինչ կընկնի իր տեղը։
Հակառակ դեպքում, եթե խստացվեն բռնությունները, ապա կսկսվի կապիտալի արտահոսք, կդադարի տնտեսական աճը, կաճի գործազրկությունը, քաղաքացիների դժգոհությունը կճնշվի դրակոնյան մեթոդներով, և արդյունքում տնտեսական ճգնաժամը կարող է ճանապարհ հարթել դեպի բռնապետություն։
