Դոնալդ Թրամփի հաղթանակը նոյեմբերյան ընտրություններում Ռուսաստանի համար ձեռնտու կլինի, համարում են դեմոկրատական կուսակցությունից ԱՄՆ նախագահի թեկնածու Հիլարի Քլինթոնի նախընտրական շտաբում, հայտնում է TASS-ը:
Այդ մասին Ֆիլադելֆիայում Դեմոկրատական կուսակցության համագումարի բացման շրջանակներում լրագրողներին երկուշաբթի օրը հայտնել է Քլինթոնի քարոզարշավի մամլո-քարտուղար Բրայան Ֆելոնը:
«Թրամփի մի շարք արտաքին քաղաքական դիրքորոշումներ ձեռնտու են Վլադիմիր Պուտինին,- հաստատել է նա:- Դա մասնավորապես վերաբերում է ՆԱՏՕ-ին մոտեցումը: Անցյալ շաբաթ Քլիվլենդի իրենց համագումարում հանրապետականները (Թրամփի պնդմամբ) նույնիսկ փոփոխել են նախընտրական հարթակը, որպեսզի Պուտինի համար ավելի ձեռնատու դիրք գրավեն»:
«Բացի այդ, Թրամփը անձամբ բազմիցս հիացել է Պուտինով»,- շարունակել է Ֆելոնը:
Քլինթոնի շտաբում կասկածում են, որ Ռուսաստանը իբր հետաքրքրված է ԱՄՆ նախագահական ընտրություններում Թրամփի հաղթանակով և դրա համար փորձում են խանգարել դեմոկրատների քարոզարշավին: Որոշ փորձագետների գնահատականով, որոնց վկայակոչում է նախկին պետքարտուղարի շրջապատը, ռուս ցանցահենները ստացել են ԱՄՆ Դեմոկրատական կուսակցության ազգային կոմիտեի նամակագրությունը և այն հանձնել են WikiLeaks կազմակերպությանը, որպեսզի պառակտում մտցնեն դեմոկրատների շարքերում: Մոսկվան հերքել է նման պնդումը: Թրամփի քարոզարշավում Ռուսաստանի հետ կապերի մասին հայտարարությունը անվանել են անհեթեթություն:
