«Ես չեմ կարծում, որ «Սասնա ծռեր» խմբի անդամները ի սկզբանե իրենց առջև դրել են պատանդներ վերցնելու խնդիր: Այնպես որ՝ այս խմբավորմանը չէր կարելի վերագրել ահաբեկչական գործունեություն»,- «Առաջին լրատվական»-ի հետ զրույցում նշեց իրավապաշտպան Վարդան Հարությունյանը՝ գնահատելով երևանյան վերջին զարգացումները:
Իրավապաշտպանի կարծիքով՝ ոստիկանությանը գրոհի անցնել թույլ չի տալիս զինված խմբի վճռականությունը, ոչ թե զսպում էր պատանդների առկայությունը. «Բոլորիս է հայտնի, թե ինչ արյունահեղություն կլինի, եթե նման անցանկալի, աննորմալ վարք դրսևորվի»:
Վարդան Հարությունյանը թեև ի սկզբանե շատ ուրախացել էր, որ միջնորդի դերով հանդես եկավ իշխանական և ազատամարտիկների շրջանում մեծ հեղինակություն վայելող Վիտալի Բալասանյանը, սակայն, այնուամենայնիվ, անընդունելի է համարում, որ նա սկսել է իր անձնական կարծիքներն արտահայտել. «Հիմա պետք է լինեն նոր միջնորդներ, առանց բանակցությունների կամ ուժով հնարավոր չէ այս խնդիրը լուծել, թեև ես մեր իշխանությունների կողմից չեմ բացառում որևէ անխոհեմ քայլ: Ես չգիտեմ՝ որքանով նրանց համար օգտակար կլինի այն հանգամանքը, որ նոր զոհեր լինեն. չէ՞ որ նրանց վրա արդեն կա Մարտի 1-ի արյունը»:
Իրավապաշտպանի խոսքով՝ կարելի է ժամանակ շահելով՝ դանդաղ, հանգիստ հասնել արդյունքի: Նա, իհարկե, անընդունելի է համարում այս ձևով խնդիրներ լուծելու տարբերակը. «Այս ձևով խնդիրներ են լուծում Ադրբեջանում, այսպիսի իշխանությունները: Սակայն երբ իշխանությունները մարդկանց մտցնում են փակուղի, և վերջիններս չեն կարողանում ելք գտնել, այդ անելանելի վիճակը նրանց ստիպում է դիմել այսպիսի քայլերի: Այնպես որ՝ ակնհայտ է, թե ովքեր են մեղավոր, և ովքեր են քաղաքական գործընթացները մղել քրեական դաշտ»:
Վարդան Հարությունյանի կարծիքով՝ մենք զենք չենք սիրում, ռազմատենչ հասարակություն չենք, և դա է պատճառը, որ հիմա հազարավոր մարդիկ չեն գնում հրապարակ, բայց շատերը իրենց և գրավոր, և բանավոր խոսքում աջակցություն են հայտնում այդ մարդկանց. «Իշխանությունը ա՛յս մասին պետք է մտածի. ինչո՞ւ են մարդիկ աջակցում զինված խմբի անդամներին, ինչո՞ւ է քննադատության սլաքն ուղղվում իշխանություններին, ոչ թե զինված խմբի անդամներին»:
Ավելին՝ միջազգային հանրությունը ևս կոչ է անում զերծ մնալ բռնություններից, մինչդեռ մեկ այլ դեպքում կաջակցեին իշխանություններին. «Այսինքն՝ աշխարհին էլ է հայտնի, թե ինչու են քաղաքական, հասարակական գործիչները դիմել նման ճանապարհի: Այնուամենայնիվ, ես վստահ եմ, որ հնարավոր է գտնել քաղաքական ելքեր»:
Մանրամասները՝ տեսանյութում: