Հայաստանում ստեղծված իրավիճակը հուզականության ֆոնին բանականության իսպառ վերացման արդյունք է: «Առաջին լրատվական»-ի հետ զրույցում նման կարծիք հայտնեց «Քաղաքացիական գիտակցություն» ՀԿ նախագահ Նարեկ Սամսոնյանը:
Նրա համոզմամբ՝ այս ամենը պատահական չէր. Ժիրայր Սեֆիլյանը երկու անգամ կալանավորվեց նմանատիպ փորձ կատարելու կասկածանքով. «Այդ մարդիկ բազմիցս հայտարարել են, որ զինված ապստամբությունը միակ հնարավորությունն է երկրում փոփոխություններ կատարելու համար»:
Մեր զրուցակցի համար զարմանալին պետության արձագանքն էր. «Մենք հասկացանք, որ երկրում գոյություն չունի Ազգային անվտանգության ծառայություն: Ի՞նչ է նշանակում, որ մարդիկ մի քանի ավտոմատով կարող են գրավել ՊՊԾ գունդը: Այսինքն՝ պետությունը չկարողացավ ապահովել ՀՀ քաղաքացիների անվտանգությունը»:
Նարեկ Սամսոնյանը այս քայլը համարում է Հայաստանի Հանրապետության դեմ ուղղված: Դիտարկմանը՝ նրանք փոփոխությունների հասնելու այլ ելք չեն գտել, ՀԿ նախագահը հակադարձեց. «Եթե նման բան ասեր Նիկոլ Փաշինյանը կամ ՀԱԿ-ը, ես կասի՝ դա օբյեկտիվ է, քանզի Կոնգրեսը վերջին տարիներին մասնակցել է բոլոր քաղաքական գործընթացներին: Սակայն այս մարդիկ ոչինչ չեն արել՝ ոչ զբաղվել են կուսակցաշինությամբ, ոչ մասնակցել են քաղաքական գործընթացներին»:
Մեր զրուցակիցը համարում է, որ փոփոխությունների համար, անկասկած, կան այլ ելքեր, պարզապես այդ ելքը պահանջում է գրագիտություն, ջանքեր. «Այլ բան է, որ այդ մարդիկ այդ ամենը չէին կարող իրականացնել, որովհետև նրանք չունեն քաղաքական միտք: Իսկ «Հիմնադիր խորհրդարանը»՝ իր մարգինալ այլ անուններով, իրավիճակը սրելու նպատակ ունի»:
Մանրամասները՝ տեսանյութում