«Իմ սիրտը ցավում է ոչ թե մտավորականների հայտարարության համար, այլ ինձ անհանգստացնում է մեր ժողովրդի անտարբերությունը: Դա է մեր դժբախտության պատճառը»,- «Առաջին լրատվական»-ի հետ զրույցում Երևանում տեղի ունեցած վերջին իրադարձութոյւնների վերաբերյալ իր մտահոգությունը հայտնեց երաժիշտ Եղիշե Պետրոսյանը:
Նրա խոսքով՝ ձեռագիրը նույնն է. մի մասը, հասկանալով այս ամենի լրջությունը, իր տեղը չի գտնում, մյուս մասը «ինչպես բառադի ապրել է, այնպես էլ շարունակում է ապրել»:
Եղիշե Պետրոսյանը նկատեց, որ ինչքան այսպես շարունակվի, այնքան կպակասեն մեր հնարավորությունները. «Այս տղաների գենը, էն առողջ գենը, որ կա մեր ազգի մեջ, որն արտահայտվեց նաև ապրիլյան պատերազմի ժամանակ, կամաց-կամաց ոչնչացվում է՝ կա՛մ միտումնավոր, կա՛մ անխելքությամբ»:
Դիտարկմանը՝ արդյո՞ք զինված մեթոդն էր միակ ելքը, Եղիշե Պետրոսյանը արձագանքեց. «Մոտավորապես 20 տարի է՝ մենք անընդհատ կանգնում ենք պատի առաջ: Սա ինչի՞ց եղավ: Սա հո խելագար մարդկանց արարք չէ՞: Մարդիկ գիտակցել են, որ այլևս ձև չկա»:
«Ես կարծում եմ՝ այս տղաների քայլով մի սարսափելի բան էլ խափանվեց»,- ասաց նա՝ նկատի ունենալով ԼՂ հարցի ոչ հայանպաստ լուծումը: