Հայաստանի Գերագույն խորհրդի պատգամավոր Ալբերտ Բաղդասարյանը ներկայացնելով Խորենացու հարթակում ձևավորված համակարգող խմբի քայլերը՝ ասաց, որ դրանք լինելու են շարժական քաղաքական ճնշման քայլեր. «Մենք էլ ենք հասկանում, որ այսպես անվերջ շարունակվել չի կարող, հետևաբար պետք է տեղափոխվեն քայլերը, որակները, իրավիճակը»:
Նա նկատեց, որ հրապարակային շատ գործիչներ, ովքեր հրաժարվել էին մտնել համակարգող խորհրդի կազմում, ամբողջ ժամանակ նկարվում էին հարթակում. «Ես կուզեի, որ մարդիկ այս առիթն օգտագործեն ոչ թե ինքնադրսևորվելու, այլ ժողովրդին ռեալ օգնելու համար»:
Ալբերտ Բաղդասարյանը տեղեկացրեց, որ իրենք սկզբունքորեն փոխելու են այն մոտեցումը, երբ միջնորդներին նշանակում են իշխանությունները. «Նրանք ստանում են տղաների համաձայնությունը և հետո դուրս են գալիս ինչպես միշտ՝ Վիտալի Բալասանյան: Ուստի մենք հասնելու ենք նրան, որ միջնորդական առաքելությունը լինի ժողովրդի կողմից հրապարակային և ընդունված, և նոր գլխացավանք առաջանա իշխանության համար, եթե սննդի հարցերը չեն կարգավորվում: Ի վերջո՝ տղաներն իրենց կյանքն են դրել, որպեսզի մեր ժողովրդի համար հարց լուծվի: Մենք առանց զենք վերցնելու, բայց իշխանությունների համար գլխացավանք ստեղծելով՝ կստիպենք, որ իշխանությունները գնան զիջումների: Եթե մենք ժողովրդով պասիվ լինենք, «Սասնա ծռերը» Մհեր չեն դառնա: «Սասնա ծռերը» հիմքն են այս ամբողջ ժողովրդի, որպեսզի ինքը դառնա «Սասնա ծուռ» և իր քաղաքական խաղաղ ճնշման միջոցով ստիպի այս օտարածին իշխանություններին զիջումների գնալ»:
Մեր զրուցակցի խոսքով՝ ամենակարևորն այն է, որ ոստիկանությունը հասկանա՝ ինքը ևս էս ժողովրդի մասնիկն է, որը Սերժի ձեռքը պատանդ է ընկել այնպես, ինչպես մեր ողջ ժողովուրդը: