ԱՄՆ նախագահ Բարաք Օբաման CBS հեռուստաալիքին տված հարցազրույցի ժամանակ Face The Nation ծրագրում հայտարարել է, որ նախկին պետքարտուղար Հիլարի Քլինթոնը ԱՄՆ նախագահի «ավելի նախապատրաստված» թեկնածու է ժամանակակից պատմությունում:
Նրա խոսքով՝ դժվար է գտնել Քլինթոնից բացի որևէ մեկին, ով ավելի շատ բան գիտի արտաքին և ներքին քաղաքականությունում, ով քաղաքականության մեջ «ամուր է, ինչպես մեխ», և ում հետ «կշարժվի այն, ինչը օգուտ է Ամերիկային»:
Օբաման նաև հավելել է, որ Քլինթոնը հասկանում է ժամանակակից ժողովրդավարությունը, որտեղ «իրադարձությունները տեղի են ունենում ոչ այնքան արագ, որքան կցանկանայինք»:
«Նա միշտ չէ, որ փորձում է տպավորություն գործել: Կան այնպիսիները, ովքեր ավելի լավ են ելույթ ունենում: Սակայն նա գիտի իր գործը: Եվ վերջնական հաշվով, հենց դա էլ անհրաժեշտ է այս գրասենյակում (Սպիտակ տուն) աշխատելու համար»,- ընդգծել է ԱՄՆ նախագահը:
Նա պարզաբանել է, որ անձնական փոստի օգտագործման Քլինթոնի որոշումը նամակագրության և գաղտնի տեղեկատվության փոխանակման համար եղել է «սխալ», սակայն երկրի համար կարևոր հարցերում «նա միշտ իրավացի է եղել»: