Ավելի քան 6 հազար մարդ իրենց ստորագրությունն են դրել խնդրագրի տակ՝ կոչ անելով երեք ֆրանսիացիներին պարգևատրել Պատվո լեգեոնի շքանշանով, որը Ֆրանսիայի բարձրագույն պարգև է, հայտնում է RIA Novosti-ն:
Խնդրագիրը տեղադրվել է change.org պորտալում հուլիսի 21-ին և ներկա պահին հավաքել է 6200 ստորագրություն: Խնդրագրի ստեղծողը կոչ է անում պարգևատրել 3 ֆրանսիացիների՝ Ֆրանկին, Գվենաելին և Ալեքսանդրին: «Իրենց հերոսական արարքներով Ֆրանկը, Գվենաելը և Ալեքսանդրը կարողացել են կրճատել զոհերի թիվը և փրկել տասնյակ ֆրանսիացիների կյանք, ովքեր եղել են բառնատարի թիրախը»,- ասված է խնդրագրի տեքստում:
Ինչպես ասված է խնդրագրում՝ 26-ամյա Գվենաելը փրկել է մարդու, որը փոխհրաձգության պահին հայտնվել է ոստիկանների և ահաբեկչի միջև: Հեծանվորդ Ալեքսանդր Նիգեն փորձել է կանգնեցնել բեռնատարը՝ կարողանալով բռնել դռան բռնակը: Նա մի քանի անգամ փորձել է բացել դուռը, սակայն չի կարողացել և բաց է թողել միայն այն ժամանակ, երբ ահաբեկիչը ատրճանակով նշան է բռնել նրա վրա:
Մոտոցիկլավար Ֆրանկը կարողացել է կախվել բեռնատարից և նույնիսկ մի քանի անգամ հարվածել է վարորդին: