Հայաստանի Գործատուների միության նախագահ Գագիկ Մակարյանը «Առաջին լրատվական»-ի հետ զրույցում գնահատելով Խորենացի փողոցի իրադարձությունները՝ ասաց. «Ընդհանրապես այդ հուզումներն ու դժգոհությունները վերջին շրջանում խիստ նկատելի էին: Դրանք արտահայտվում էին թե էլեկտրաէներգիայի սակագնի թանկացմամբ, թե այլ պատճառներով: Այսինքն՝ դրանք պայմանավորված են սոցիալ-տնտեսական և քաղաքական վիճակով»:
Նրա խոսքով՝ եթե անգամ տնտեսության մեջ գրանցվում է աճ, հասարակության հիմնական զանգվածները չեն օգտվում դրանից, որովհետև Հայաստանը մխրճված է կոռուպցիայի և մենաշնորհների ճահճում, և «տնտեսության մեծ կտորը տեղափոխվում է որոշակի մարդկանց ձեռքը: Այդ՝ արդեն հազարավորների հասնող մարդկանց կյանքը գունավոր է թվում, իսկ այն մարդիկ, ովքեր ապրում են աղքատության մեջ, պետք է ինչ-որ կերպ իրենց դժգոհությունն արտահայտեն»:
Մեր զրուցակցի կարծիքով՝ այնուամենայնիվ, այս ճանապարհը ճիշտ չէ, որովհետև վաղը նույն հոգեբանությամբ կարող է պահանջներ դնել մեկ այլ խումբ և մի քանիսին կրկին պատանդ վերցնել. «Սակայն այս մոդելի հետ պետք է հաշվի նստել, որովհետև այն ահազանգում է որոշակի իրավիճակներ, որոնք պետք է հասկանալ: Ցավոք, պետական շատ պաշտոնյաներ և սոցիալ-տնտեսական ոլորտի շատ պատասխանատուներ նույնիսկ չեն ցանկանում վերլուծել: Մինչդեռ պետք է կատարվեն էքսկլյուզիվ քայլեր և տրվեն գլոբալ լուծումներ, ոչ թե իրավիճակային»:
Գագիկ Մակարյանի համոզմամբ՝ այսօր կան պետական պաշտոնյաներ և պատգամավորներ, որոնք պետք է անհապաղ լքեն իրենց պաշտոնները. «Այդ մարդիկ նույնիսկ ավելի շատ են վնասում երկրի հեղինակությանը, քան նրանք, ովքեր այսօր այս քայլերին գնացին; Վերջիններս գոնե ժամանակին կռվել են ազնիվ մղումներով և հիմա էլ փորձում են ազնիվ մղումներվ իրենց ըմբոստությունն արտահայտել: Չարդարացնելով իրենց՝ ես հասկանում եմ, թե ինչու են նրանք այս կատաստրոֆիկ քայլերին գնում»:
Մանրամասները՝ տեսանյութում: