«Ստեղծված ռազմական ապստամբությունը լոկալ՝ կետային դեպք է և հանդիսանում է պետության քայքայման ախտանիշ. երկարատև ոչ լեգիտիմ իշխանության ժամանակ պետությունն սկսում է հանկարծակի քայքայվել, և սա այդ քայքայման դրսևորումներից է»,- գնահատելով Հայաստանում ստեղծված իրավիճակը՝ «Առաջին լրատվական»-ի հետ զրույցում նշեց հրապարակախոս Արա Նեդոլյանը:
Նրա խոսքով՝ այս օրերին պարզ կդառնա՝ տեղի է ունենում իսկապե՞ս պետության քայքայում, թե՞ պետության լեգիտիմությանն ուղղված ինչ-որ գործընթաց: Հրապարակախոսի կարծիքով՝ դա մեծագույնս կախված է նրանից, թե ինչ չափով և ձևերով հասարակությունը կկարողանա մասնակցել այս ընթացքին:
Արա Նեդոլյանը դրական է գնահատում Նիկոլ Փաշինյանի՝ այստեղ քաղաքական տարր մտցնելու փորձը. «Այստեղ խնդրահարույց է, թե ով պետք է ձևավորի այդ քաղաքական տեքստը: Կա երեք տարբերակ. կա՛մ պետք է ձևավորի «Սասնա ծռերն» ու նրա քաղաքական թևը, կա՛մ կուսակցություններն են գալիս՝ ինչպես փորձեց անել Նիկոլ Փաշինյանը, և կա նաև երրորդ՝ իդեալական տարբերակը՝ երբ ինքնակազմակերպվող հանրույթը ինքն է ձևավորում այդ տեքստը՝ երկխոսության մեջ մտնելով և՛ քաղաքական կուսակցությունների, և՛ «Սասնա ծռերի» ու նրա քաղաքական թևի հետ»:
Արա Նեդոլյանի կարծիքով՝ եթե այս դեպքը հանգուցալուծվի, այսինքն՝ չունենա վառ հետևանքներ, ապա նման դեպքերը կունենան կրկնվելու միտում. «Օրակարգի թիվ մեկ հարցը իշխանություններից ազատվելն է, սակայն 2-րդ, 3-րդ, 4-րդ հարցերը գրեթե չեն քննարկվում»:
Անդրադառնալով Խորենացու հարթակին՝ հրապարակախոսը նշեց, որ այն ունի երկակիություն. «Մի կողմից՝ մարդիկ գալիս և մասնակցում են, և դա շատ դրական է, մյուս կողմից՝ կա նյարդայնացում, թե ինչու են գալիս և ինչու են մասնակցում: Այն վախերը, որ ինչ-որ մեկը գալիս է և փորձում է ուղղորդել իրենով կամ քաղաքական ռեյտինգ հավաքել, ինձ թվում է՝ անհիմն են, որովհետև սա քաղաքական գործունեության վայր է՝ իր բոլոր իմաստներով, որոնց մեջ միգուցե մտնում է նաև քաղաքական ռեյտինգ հավաքելը: Իհարկե, այդ ռեյտինգը պետք է հավաքվի հենց այս պահերին և հենց այս վայրերում»:
Մանրամասները՝ տեսանյութում:
