Ինչպես հայտնի է, «Սասնա ծռեր» խմբավորումը ազատ է արձակել բոլոր 4 պատանդներին, և Հայաստանում ստեղծվել է նոր իրավիճակ:
Մարդու իրավունքների նախկին պաշտպան Լարիսա Ալավերդյանը բնորոշելով նոր զարգացումները՝ «Առաջին լրատվական»-ի հետ զրույցում ասաց. «Ես կասկած չունեի, որ բոլոր պատանդները պետք է ողջ-առողջ ազատ արձակվեին: Դա նկատելի էր առաջին իսկ պահից, իսկ այն ողբերգական մահը պատահական էր, և հասկանալի էր, որ տղաներն այդտեղ չեն գնացել մարդասպանություն կատարելու»:
Նրա խոսքով՝ վտանգն այն է, որ կշարունակվի մեծանալ անվստահության այն մակարդակը, որը թվում էր՝ այլևս մեծանալու տեղ չունի:
«Ես պնդում եմ՝ իշխանություններն այդպես էլ չցանկացան ավելի սերտորեն աշխատել հասարակության հետ»,- նկատեց Լարիսա Ալավերդյանը:
Նրա խոսքով՝ հայկական մենթալիտետին բնորոշ և պատմության մեջ աննախադեպ դեպք է, երբ պատանդի կարգավիճակում գտնվողին զենք են տալիս, որպեսզի օդ կրակեն՝ ի հարգանս զոհված իրենց գործընկերոջ. «Նշանակում է, որ մենք գործ ունենք կարծրացած մոտեցումների ոչ թե այդ տղաների, այլ իշխանությունների կողմից»:
Մեր զրուցակիցը հիշելով նախագահի խոսքը, թե՝ պատանդներ վերցնելով՝ հարցերը չեն լուծվում, նկատեց, «Դա մենք գիտենք, մենք նախագահից սպասում էինք, որ ասեր, թե ինչպես են հարցերը լուծվում: Եվ քանի որ իշխանությունները ոչ միայն քայլ չարեցին առաջ, այլ անգամ սրեցին իրավիճակը, ուստի նույնիսկ հասարակության ամենահավասարակշիռ հատվածի մոտ առաջանում է տրամադրությունների արմատականացում»:
Լարիսա Ալավերդյանը տեղեկացրեց, որ իրենց հասարակական կազմակերպությունը՝ «Ընդդեմ իրավական կամայականության», պատրաստել է կոչ, որում ներկայացվել են ոստիկանության բոլոր բռնությունները:
Մանրամասները՝ տեսանյութում: