«Այս գունդը դարձել էր իմ ժողովրդի գլխին որպես չարիք: Դուք տեսնում էիք, թե ինչպես էին նրանք վերաբերվում ժողովրդի հետ, թե ինչպես էին քացի տալիս, ինչպես էին բռնանում, անարգում, հենց երբեմն նաև ձեզ՝ լրագրողներիդ: Թե ինչպիսի շվայտ ու ցոփ կյանքով են ապրել սրանք այստեղ, մենք արդեն տեսնում ենք: Դրան արդեն ես եմ ականատես, թե ինչ պայմաններ են ստեղծվել նրանց համար: Եթե հայ զինվորը գոնե սրա մեկ տասներորդով ապահովված լիներ, մենք այդպիսի խայտառակ տեսարան չէինք ունենա,- այս մասին լրագրողների հետ այսօր ՊՊԾ գնդի տարածքում ասաց «Սասնա ծռեր» խմբի անդամ Պավլիկ Մանուկյանը և ցույց տալով իր կրած զենքերը՝ հավելեց՝ այստեղ ինչ-որ տեսնում եք, նրանք սիրահոժար նվիրել են մեզ:
Հետագա քայլերի մասին Պավլիկ Մանուկյանը նշեց. «Մենք կմեռնենք, բայց առանց հաղթանակի այստեղից դուրս չենք գա, մենք ցանկանում ենք անարյուն լինի»:
«Ես կխնդրեի, որ ժողովուրդը զգոն լինի և գնա դեպի թունելի լույսը: Ես չեմ ասում, թե մենք թունելի լույսն ենք, բայց շողն ենք, ժողովուրդը դեպի այդ լույսը պիտի կողմնորոշվի: Դուք էլ պիտի զրկանք կրեք, դուք էլ պիտի այնտեղ ներկա լինեք, քաղաքական ուժերը մեռած են, այնտեղ ոչ ոք ուղղորդող չկա: Բոլոր կուսակցությունները իրենց սպառել են: Սա ժողովրդական ապստամբության, ցասումի… ժողովուրդը պիտի լինի իր իշխանությունը, մեզանից ոչ մեկին իշխանություն պետք չէ, ինձ ազատությունն է պետք, ինձ պետք է իմ ժողովրդին այս թշվառ վիճակից հանելը: Եվ ես, որպես նրա զինվոր, ես այլևս չէի կարող հանդուրժել»:
Մանրամասները՝ տեսանյութում: