Վերջին օրերին Հայաստանում ստեղծվել է արտառոց իրավիճակ, արդեն ազատ են արձակվել պատանդները, և նոր իրավիճակ է ստեղծվել, այս պահի դրությամբ ի՞նչ երաշխիքներ կան, որ իշխանությունները չեն գնա հարձակման և չեն ձերբակալի «Սասնա ծռեր» խմբի անդամներին. այս հարցերի շուրջ «Առաջին լրատվական»- ի հետ զրույցում իրավապաշտպան Ավետիք Իշխանյանն ասաց. «Երբ ժողովրդի և ոստիկանության միջև բախում առաջացավ, շատ անհանգստացա՝ մտավախություն ունենալով, որ այդ բախումը հրահրվեց, որպեսզի ձեռքերն ազատեն հետագա հարձակման համար, բայց բարեբախտաբար դա տեղի չունեցավ»:
Անդրադառնալով երեք քաղաքական ուժերի՝ նախագահ Ս. Սարգսյանի, առաջին նախագահ Լ. Տեր-Պետրոսյանի և ՀՅԴ-ի՝ նախօրեին հնչեցրած հայտարարություններին՝ Ավետիք Իշխանյանը նշեց. «Կարծես թե դա մի համազարկ էր՝ հավանաբար ապագա խորհրդարանի կոալիցիայի կողմից: Չեմ կարծում, որ առանց իրար հետ պայմանավորվելու միաժամանակ երեք այդպիսի հայտարարություն լիներ: Դա բավականին անհանգստացնող է, այդ հայտարարություններում չկա անդրադարձ ոստիկանական բռնությունների, պատճառների և այլնի մասին, փաստորեն դա համաձայնություն էր ուժային մեթոդ կիրառելու վերաբերյալ: Բարեբախտաբար ուժային մեթոդ չկիրառվեց, բանակցությունները շարունակվում են, այստեղ մեծ դեր ունեցավ հասարակությունը և գործիչների ելույթներն այն մասին, որ ուժի կիրառումը կարող է բերել անկանխատեսելի հետևանքների»:
Ավետիք Իշխանյանի խոսքով՝ «Սասնա ծռեր»- ի գործողությունները ահաբեկչություն չեն: Իրավապաշտպանի դիտարկմամբ՝ դեռևս բոլորովին երաշխիք չկա, որ իշխանությունները հարձակում չեն գործի: «Եթե հանկարծ իշխանությունները որոշեն ուժային ձևով լուծել հարցը, չեմ պատկերացնում, թե ուժային հանգուցալուծումից հետո մենք ինչպիսի Հայաստանում ենք ապրելու. դա կբերի մի կողմից հասարակության զանգվածների կատաղության հասնող գրգռվածության, մի մասի մոտ դա կարող է վերածվել հուսահատության և երկիրը լքելու ցանկության, դա կլինի հոգեբանական անկում…»:
Մանրամասները՝ տեսանյութում: