ԱՄՆ-ը, ԵՄ-ն և Ռուսաստանը հանդես եկան հայտարարություններով. հայաստանյան իրադարձությունների վերաբերյալ միջազգային արձագանքին «Առաջին լրատվական»- ի հետ զրույցում անդրադարձավ քաղաքագետ Աղասի Ենոքյանը: Նրա դիտարկմամբ՝ հայտարարություններում երևանյան իրադարձություններին տրված գնահատական չկար, միայն կոչ էր՝ իրավիճակը խաղաղ ճանապարհով հանգուցալուծելու մասին: Քաղաքագետի խոսքով՝ միակ գնահատականն այն է, որ սա զինված մեթոդներով փոփոխությունների հասնելու փորձ էր, և կոչ էր արվում, որ ամեն ինչ ընթանա ժողովրդավարական ճանապարհով:
«ԵՄ հայտարարության մեջ կա լուրջ անդրադարձ ոստիկանության բավականին կոշտ միջոցառումներին և անօրինական գործողություններին, և կոչ է արվում, որ ոստիկանությունը գործի պատշաճ մակարդակով՝ օրենքի սահմաններում»,- նկատեց մեր զրուցակիցը:
Աղասի Ենոքյանն անդրադառնալով զինված խմբի կողմից բոլոր պատանդների ազատ արձակման փաստին (այդ թվում նաև՝ հուլիսի 17-ից պատանդի կարգավիճակում գտնվող ՀՀ փոխոստիկանապետ Վարդան Եղիազարյանի և Երևանի փոխոստիկանապետ Վալերի Օսիպյանի ազատ արձակմանը)` նշեց. «Ըստ էության խնդրի ամենածանր մասը կարծես թե հանգուցալուծվեց, հիմա պետք է տեսնենք հետագա ինչ զարգացումներ կարող են լինել՝ զիված խումբն ազատելու է այդ տարածքը թե ոչ և ինչ պայամաններով է ազատելու, ի՞նչպես է քաղաքական պահանջներ ներկայացնելու»:
«Մամուլի կենտրոնի բացումը զինված խմբին արտաքին աշխարհի հետ անընդահատ շփվելու հնարավորություն կընձեռի»,- նշեց քաղաքագետը և հավելեց՝ պետք է ենթադրել, որ նրանք բավականաչափ ասելիք ունեն:
«Փաստորեն այս խումբը հիմա ինքն իրեն է պատանդ պահում, քանի որ այնտեղ մեծ քանակությամբ զինամթերք կա,- նկատեց Աղասի Ենոքյանը,- տարօրինակ, աննախադեպ իրավիճակ է ստեղծվել»:
Մանրամասները՝ տեսանյութում:
