«Գյումրեցիները, ինչպես նաև ողջ հայ ժողովուրդը ցանկանում են, որ իշխանությունների և «Սասնա ծռեր»- ի միջև կոնֆլիկտը խաղաղ մեթոդներով լուծվի»,- այս մասին «Առաջին լրատվական»- ի հետ զրույցում ասաց քաղաքագետ Գագիկ Համբարյանը՝ հավելելով, որ վտանգավոր իրավիճակ է ստեղծվել:
Քաղաքագետը «Սասնա ծռեր»- ի անդամներին ահաբեկիչներ կամ ապստամբներ չի համարում, այլ խռովարարներ. «Նրանք դժգոհ էին Հայաստանում գոյություն ունեցող իրավիճակից և ինքնըստինքյան խռովություն բարձրացրին»:
«Եթե իշխանությունները մտածում են, որ մարտի 1-ին ճնշեցին և վերջ, հասարակությունը վախենում է, ո՛չ, այդպես չէ, մի տեղ կկուտակվի և պայթյուն կլինի ավելի վատ ձևով: Մենք հասել ենք ամենավտանգավոր աստիճանին, մեզ մոտ գնում է աֆղանացման գործընթաց՝ այսինքն՝ մենք դառնում ենք Աֆղանստանի նման երկիր»,- մտահոգություն հայտնեց քաղաքագետը:
Գ. Համբարյանը նաև նշեց, որ ՊՊԾ գնդի գրավումից հետո Հայաստանի իշխանությունները պետք է շատ լուրջ մտածեն. «Որևիցե հրամանատար պետք է իրավունք չունենա այս մեթոդներով հարցեր լուծել Հայաստանի Հանրապետությունում, և խնդիրը ոչ թե նրանք են, այլ ղեկավարներն են, որոնք թույլ չպետք է տան, որ հասարակության և իրենց միջև անջրպետն այնքան մեծանա, որ մարդիկ զենք վերցնեն»:
Մանրամասները՝ տեսանյութում:
