Անդրադառնալով գրեթե մեկ շաբաթ Հայաստանում տիրող արտառոց իրավիճակին՝ Երևանի մամուլի ակումբի նախագահ Բորիս Նավասարդյանը «Առաջին լրատվական»- ի հետ զրույցում նշեց, որ իրեն չի զարմացնում քաղաքական կուսակցությունների պասիվությունն այս իրավիճակում, քանի որ, ըստ նրա, քաղաքական դաշտը ոչ թե այս 6 օրերի ընթացքում է հասել այս վիճակին, այլ ամիսներ շարունակ: «Ակնկալիք չունեի, որ կուսակցություններն առանձնապես արագ կարձագանքեն կամ կուզենան մեծ ներդրում ունենալ հանգուցալուծման համար»,- նշեց Բ. Նավասարդյանը՝ հավելելով, որ պետք չէ քաղաքական դաշտի վրա հույս դնել:
Նրա կարծիքով՝ իրավիճակի հանգուցալուծման հարցում քաղաքացիական հասարակությունը նույնպես այս պահին անելիք չունի. «Ընթանում են բավականին բարդ բանակցություններ, և այդ բանակցությունների կողմերը կարող են լինել միայն իշխանությունները և ապստամբները»:
Ինչքան էլ համարվի, որ իրավիճակը փակուղային է, Բորիս Նավասարդյանը լավատես է և կարծում է, որ լուծումների մոդելներ կան, նրա կարծիքով՝ մնում է, որ այդ մոդելները դրվեն բանակցային սեղանին և կողմերը համոզվեն, որ այդ մոդելներից մեկի ընդունմանն այլընտրանք չկա:
«Մենք ունենք երկու կարևորագույն խնդիր՝ թույլ չտալ, որ լինի ուժային լուծում, այստեղ և՛ քաղաքացիական հասարակությունը, և՛ Հայաստանի բոլոր պատասխանատու քաղաքացիները պետք է այդ պահանջը շատ հստակ ձևակերպեն, և երկրորդ խնդիրը՝ պահանջել, որ բոլոր անօրինական գործողությունները, որոնք իրականացվել են իրավապահ մարմինների կողմից, հետաքննվեն և պատժվեն այն անձինք, ովքեր հրամաններ են տվել, և ովքեր իրականացրել են քաղաքացիների սահմանադրական իրավունքների կոպտագույն զանգվածային խախտումներ»,- նշեց Բ. Նավասարյանը:
Երևանի մամուլի ակումբի նախագահի դիտարկմամբ՝ միջազգային հանրության արձագանքը երևանյան դեպքերին զուսպ և տրամաբանական էր:
Մանրամասները՝ տեսանյութում: