«Այսօր մենք գործ ունենք զինված, եթե չասենք ապստամբության, ապա զինված քաղաքական բողոքի հետ, սա բողոք է, քաղաքական ակցիա, ոչ թե ահաբեկչություն, և բխում է այն իրավիճակից, որը Հայաստանում ձևավորել են իշխանությունները՝ կոռումպացված ուժերը»,- անդրադառնալով «Սասնա ծռեր» խմբի իրականացրած գործողություններին և Հայաստանում ստեղծված աննախադեպ իրավիճակին, «Առաջին լրատվական»- ի հետ զրույցում այս տեսակետը հայտնեց ազգագրագետ Աղասի Թադևոսյանը:
Ա. Թադևոսյանի դիտարկմամբ՝ «Սասնա ծռեր» խմբի գործունեությունը չպետք է Հայաստանում ընթացող գործողություններից առանձնացված դիտարկել: Նրա խոսքով՝ իհարկե քաղաքական գործընթացների հիմնական հարթակը ընտրություններն են, սակայն ընտրական մեխանիզմները Հայաստանում, ըստ էության, չեն գործում իշխանության մեղքով, և որևէ քաղաքական ուժ, մասնակցելով ընտրությունների, որևէ շանս չունի հաղթահարելու 5 տոկոսի շեմը, որովհետև ընտրություններն ամբողջովին կոռումպացված են իշխանությունների կողմից:
«Այսօր քաղաքացիական շարժման փոխարեն մենք ունենք փողոցային ինչ-որ շարժումներ, որոնք, իմ կարծիքով, ուղղորդվում են իշխանության կողմից: Եվ այս ամայի դաշտում իշխանությունը միակ խաղացողն է, որը փորձում է խաղ խաղալ այստեղ և շատ լուռ՝ իր շահերը տեսնելով և հաշվարկելով,- նշեց Ա. Թադևոսյանը՝ հավելելով, որ այդ խաղի մեջ է հայտնվել նաև զինված, անձնվեր մարդկանց խումբը:
Մեր զրուցակցի խոսքով՝ որքան էլ ցավալի է, որոշիչ է լինելու դաշտը ամայացնող իշխանությունների որոշումը: «Իսկ իշխանությունները, ներքին կյանքի առումով, որևէ լավ բան չեն արել մեր ժողովրդի համար»:
Մանրամասները՝ տեսանյութում: