ԱԺ պատգամավոր Նիկոլ Փաշինյանն այսօր Խորենացի փողոցում հանդես եկավ հայտարարությամբ: Նա նախ ասաց, որ կարդացել է մարդկանց կողմից իրեն ուղղված բոլոր նամակները. «Դրանք այնքան շատ էին, որ չէի կարող մեկ առ մեկ պատասխանել ու դրանց պատասխանն այսօր բոլորիդ հետ միասին Խորենացի փողոցում գտնվելն է: Այսօրվա ու բոլոր ժամանակների համար պետք է արձանագրել մի բան՝ ես ծառայում եմ ՀՀ-ին, ԼՂՀ-ին և ամենակարևորը՝ հայ ժողովրդին: Եվ ինչ էլ որոշի ժողովուրդը, պարտավորվում եմ այդ որոշումը ի կատար ածել՝ մի պայմանով, որ որոշումը պետք է լինի հստակ ու աներկբա, տեսանելի ու կասկածի տեղիք չտվող»:
Նիկոլ Փաշինյանը նշեց, որ իր ելույթում միջակետ է դնում ու անդրադառնում այսօր տեղի ունեցած մեկ-երկու իրադարձության. «Այսօր հայտարարությամբ հանդես է եկել ՀՀ առաջին նախագահ Լևոն Տեր-Պետրոսյանը և շատ տարօրինակ հայտարարությամբ: Անդրադառնալով ՊՊԾ գնդում տեղի ունեցածին՝ նա ասել է՝ այսօր անիմաստ է վերլուծել այն պատճառները, որ առիթ են տվել այդ գործողություններին, հետո կվերլուծենք: Եթե նման հայտարարություն աներ քաղաքագիտության առաջին կուրսի ուսանողը, ես չէի զարմանա, սակայն առաջին նախագահի անունից լսել նման հայտարարություն, առնվազն տարօրինակ է: Նման բան ասել, նշանակում է հետևյալը՝ եկեք թողենք հիվանդը մեռնի, դիահերձումից հետո կվերլուծենք մահվան պատճառը: Ես համարում եմ, որ սա ամոթալի հայտարարություն է: Մի՞թե առաջին նախագահը չէր հասկանում՝ ինչ է ասում, խիստ կասկածում եմ, որ չէր հասկանում»:
Ն. Փաշինյանի կարծիքով, երբ Լևոն Տեր-Պետրոսյանը ասում է, թե հիմա պետք չէ վերլուծել այս իրավիճակը, ըստ էության, նա ասում է, որ պետք չէ անել այնպիսի մտահանգումներ, որ Սերժ Սարգսյանը հնարավորինս շուտ պետք է հեռանա իշխանությունից. «Ինչո՞ւ է նա սա ասում, որովհետև Լևոն Տեր-Պետրոսյանը, ինձ համար շատ ցավալի է, այո՛, դաշինք է կազմել Սերժ Սարգսյանի հետ ԼՂՀ հարցում մի ծրագիր իրականացնելու համար, որը հայտնի է որպես լավրովի պլան, դա խայտառակ և ստորացուցիչ լուծում է Հայաստանի Հանրապետության համար…
Ինչո՞ւ է Լևոն Տեր-Պետրոսյանը սա անում՝ բացի աշխարհաքաղաքական պատճառներից, այստեղ կա նաև կարևոր՝ անձնական մոտիվ՝ նա ուզում է օգնել Սերժ Սարգսյանին ազատագրված տարածքները հանձնելու համար, որպեսզի կարողանա արձանագրել, որ 97-98թթ ճիշտ էր ասում: Սա ամոթալի մոտեցում է: Չի կարող խոսք լինել այդ մասին մի իրավիճակում, երբ Ալիևը ատամները սրած ամեն օր հոխորտում է ՀՀ-ի և հայ ժողովրդի հասցեին: Այսպիսի մթնոլորտում խոսել փոխզիջման մասին, նշանակում է խոսել ՀՀ և ԼՂՀ կապիտուլյացիայի մասին: Բայց ենք թույլ չենք տալու Հայաստանի և Ղարաբաղի կապիտուլյացիան: Հայ ժողովուրդը ամեն ինչ պետք է անի խուսափելու համար դրանից: Սա Հայաստանի քաղաքական օրակարգի ամենակարևոր հարցն է»:
Նիկոլ Փաշինյանն անդրադարձավ նաև «Սասնա ծռեր» խմբի գործողունեւոթյանը: Նա հավաստիացրեց, որ առաջին իսկ վայրկյաններից իր բոլոր գործողությունները միտված են եղել ապացուցելու, որ «Սասնա ծռեր» խմբի տղաները ահաբեկիչներ չեն: «Նրանք հայրենասեր, հայրենանվեր մարդիկ են…»
Մանրամասները՝ տեսանյութում:
