Հուլիսի 17-ից սկսած՝ Հայաստանում աննախադեպ իրավիճակ է ստեղծվել, ոմանք «Սասնա ծռեր» խմբի գործողությունները բնորոշում են որպես ահաբեկչություն, ոմանք ապստամբություն են համարում, իսկ երկրի ղեկավարները, կուսակցությունները մինչ այժմ լռում էին, սակայն այսօր հայտարարությամբ հանդես եկան Սերժ Սարգսյանը, Լևոն Տեր-Պետրոսյանը, նաև ՀՅԴ գերագույն մարմինը հայտարարություն տարածեց:
«Երևի 6 օրը բավարար էր, որպեսզի կարողանային վերաբերմունք ցուցաբերել այս իրադարձությունների նկատամբ և որոշումներ ընդունեին, թե ինչպիսի հանգուցալուծում են տեսնում, և կարծես թե ասվում էր այդ մասին Ս. Սարգսյանի ելույթում, որ ամեն ինչ պետք է կատարվի օրենքի շրջանակներում, չպետք է լինի արյունահեղություն»,- այս մասին «Առաջին լրատվական»- ի հետ զրույցում նշեց քաղաքագետ Աղասի Ենոքյանը:
Նրա դիտարկմամբ՝ սա արդեն ուղեցույց է իր կուսակիցներին, իրեն հավատացող ՀՀ քաղաքացիներին, թե ինչպիսի վերաբերմունք պետք է լինի այս իրադարձությունների նկատմամբ, այնուամենայնիվ, չկա գնահատական, թե ինչու նման բան հնարավոր եղավ և ինչու է այս զինված խմբավորման հետևից գալիս ժողովուրդը: «Կարծում եմ՝ վերլուծություններ պետք է կատարվեին և ներկայացվեին,- նշեց քաղաքագետը,- Լ. Տեր-Պետրոսյանն իր խոսքում նշում է, որ թող խնդիրը լուծվի, հիմա վերլուծությունների ժամանակը չէ: Այս ամեն ինչը կարծես թե լրացնում է ՀՅԴ ԳՄ հայտարարությունը, որում նշվում է, որ սա այնպիսի ճգնաժամերից է, ինչպիսին Հոկտեմբերի 27-ն էր, Մարտի 1-ն էր:
Ամենակարևորը՝ ո՛չ Հոկտեմբերի 27-ից, ո՛չ Մարտի 1-ից հետո չեղան իրավիճակի ադեկվատ գնահատական և այդ գնահատականին համապատասխան քայլեր, որոնք հնարավորություն կտային նորանոր ճգնաժամերից խուսափել»,- նշեց քաղքագետը:
Ա. Ենոքյանի խոսքով՝ քաղաքական լուծումների մասին խոսք չի ասվում, բայց Ս. Սարգսյանի ելույթից երևում է, որ իշխանությունները լինելու են անզիջում:
Մանրամասները՝ տեսանյութում: