Արդեն 6-րդ օրն է՝ ոստիկանության Պարեկապահակային ծառայության գունդը շարունակում է մնալ «Սասնա ծռեր» զինված խմբավորման հսկողության տակ: Այսօր ի վերջո տևական լռությունից հետո ելույթ ունեցավ ՀՀ նախագահ Սերժ Սարգսյանը՝ նշելով, որ «մենք իրավունք չունենք թույլ տալու, որ մեր ողջ հասարակությունը այս լարվածության պատանդը դառնա… այս իրավիճակը ավելի երկար է տևել, քան մենք կարող էինք մեզ թույլ տալ»:
Քաղաքական վերլուծաբան Լևոն Մարգարյանը «Առաջին լրատվական»-ի հետ զրույցում Սերժ Սարգսյանի ելույթը գնահատեց բավականին զուսպ, քանի որ նրա խոսքով՝ դժգոհ զանգվածի ցասման թափն արդեն բավականին կոտրվել է. «Քանի որ այդ ցասումը այնքան էլ համակարգված չէր և քաղաքական նոր պահանջների չբերեց և ոչ էլ օգնեց ՊՊԾ գնդում գտնվողների քաղաքական պահանջների իրագործմանը, ուստի այդ թափը կոտրվեց, և Սերժ Սարգսյանն արդեն կարող էր իրեն թույլ տալ հայտարարություն անել և տողատակերում հայտնել, թե՝ համբերել ենք ավելի երկար, քան կարող էինք և պետք է համբերեինք»:
Մեր զրուցակցի համոզմամբ՝ խնդիրը ոչ այնքան այդ ՊՊԾ գնդի գրավումն էր, որքան հասարակական դժգոհության հետևանքով առաջացած մարդկանց ընդվզումը, բողոքի ալիքը, որից իսկապես իշխանությունները վախենում են:
Անդրադառնալով այս հարցի հանգուցալուծմանը՝ Լևոն Մարգարյանն ասաց, «Խորենացի փողոցում մենք ունենք երկու սյուժե. բուն սյուժեն այն է, որ մի խումբ զինված անձինք գրավում են ՊՊԾ գունդը և ինչ-որ պահանջներ են ներկայացնում: Սա ավելի շատ երկուսի՝ զինված խմբի և իշխանությունների խնդիրն է: Սակայն ստեղծվեց նաև երկրորդ սյուժե, որը փակեց առաջին սյուժեն. դա քաղաքացիական, հասարակական ընդվզման դրսևորումներն էին: Այս սյուժեն միշտ կա Հայաստանում»:
Մեր զրուցակիցը կարծում է, որ զինյալները հայտնվել են փակուղում, քանի որ նրանց պահանջները անորոշ են. «Իրավիճակը որքան բարդ է իշխանության համար, մի քանի անգամ ավելի բարդ է նրանց համար, քանի որ եթե սրացում չլինի, նրանք ի վերջո հավերժ չեն կարող այնտեղ մնալ: Իսկ իշխանության համար այնքան բարդ չէ առաջին սյուժեում, որքան երկրորդում»:
Մանրամասները՝ տեսանյութում:
