Կինեմատոգրաֆիստների միության նախագահ Ռուբեն Գևորգյանցն այսօր Հայաստանի ստեղծագործական միությունների ղեկավարների ասուլիսի ժամանակ նշեց, որ ինքն էլ այն կարծիքին է, որ պետք է ամեն գնով խուսափել արյունահեղությունից, պարզապես դրա համար մեխանիզմներ են պետք, որոնք ոչ թե ժողովուրդը կամ մտավորականները պետք է ասեն, այլ համապատասխան գերատեսչությունները, քանի որ նրանք դրա համար աշխատավարձ են ստանում մեր տուրքերից: Գևորգյանցը կարծում է, որ ելք կլիներ, եթե իշխանությունները կատարեին տղաների առաջին պահանջը՝ ազատ արձակեին Ժիրայր Սեֆիլյանին, սակայն ոչ միայն դա չարեցին, այլ չեն կատարի նաև հրաժարականի պահանջը:
Խոսելով ՊՊԾ շենքը գրաված «Սասնա ծռեր»-ի մասին՝ նա նշեց. «25 տղաներն էլ ազնիվ տղաներ են: Համոզված եմ, որ այն մահը, որ, ցավոք սրտի, եղել է, միտումնավոր չի արվել: Տղաներն այս քայլին ստիպված են գնացել, որովհետև արդեն անհնարին է դիմանալ այսքան առնետների գոյությանը Հայաստանում: Առնետներին պետք է ոչնչացնել: Այլևս Հայաստանը չի կարող գնալ նույն ճանապարհով, ինչքան գնացել է 25 տարի, 25 տարի աճեցրել ենք առնետներ, դրանցից ազատվել է պետք»:
Կինեմատոգրաֆիստների միության նախագահը նաև հավելեց, որ մտահոգիչ է Ղարաբաղյան հարցի վերաբերյալ իշխանությունների դիրքորոշումը. «Այդ հարցը թաքուն թղթերով պահվում է պահարաններում, բայց մենք պետք է իմանանք: Չգիտեմ՝ ով է մեզ ինչ պարտադրում, բայց մեկ մարդ չի որոշելու դա, ոչ էլ պառլամենտը, դա պետք է որոշի ազգի ռեֆերենդումը, որով բոլորը կասեն ՝ մեկ սանտիմետր հող չենք տա»:
Մանրամասները՝ տեսանյութում: