Ավստրալիայում անցկացված՝ Արցախի զորակցությանը նվիրված հեռուստամարաթոնի ընթացքում հավաքագրվել է 112 հազար դոլար: Այս մասին տեղեկացնում է Հայ դատի հանձնախմբի գործադիր ադմինիստրատոր Արին Մարգարյանը` ընդգծելով, որ բավական ակտիվ մասնակցություն է գրանցվել:
«Ընդհանուր առմամբ, ֆինանսական փոխանցումներն Ավստրալիայի հայ համայնքից էին: Մեծ հպարտությամբ կարող եմ ասել, որ Ավստրալիայի հայերը ցուցաբերեցին առատաձեռնություն և բարություն Արցախի ժողովրդի համար: Մեր համայնքը ցուցադրեց, թե ինչպես կարող է լինել միասնական և ուժեղ` օգնելու մեր Արցախի քաջ ժողովրդին: Շատ ուրախ ենք նվիրատվությունների այսպիսի արդյունքների համար: Ինչպես երգի բառերն են` «Արցախն է մեզ կանչում, օգնության հասեք», կարծում եմ այս համայնքը կարող է հպարտ լինել իր ակտիվությամբ, ֆինանսական օգնությամբ»,-ասել է Արին Մարգարյանը: Նա ընդգծել է, որ կարևոր չէ, թե ով որքան գումար է նվիրաբերել, քանի որ բոլորը` երիտասարդներից մինչև տարեցներ, միացել են Արցախին օգնելու գործին: Ստացվել են նվիրատվություններ ավստրալական 10 դոլարից մինչև 10 հազար դոլար:
«Մեծամասնությունն, իհարկե, հայերն են նվիրատվություն կատարել, բայց նվիրատվություններ են ստացվել նաև հույներից և ասորիներից: Նրանք են, ովքեր տեղյակ են մեր այսօրվա խնդիրներից»,-հավելել է Արին Մարգարյանը: Հանգանակված գումարն ամբողջությամբ տրամադրվելու է «ԼՂՀ անկախության, անվտանգության և խաղաղության հիմնադրամ»-ին:
Գումարների օգտագործման նպատակի վերաբերյալ կա համաձայնություն Արցախի հետ: Արդեն իսկ հստակ է առաջին ծրագիրը` բանակի համար անհրաժեշտ սարքավորումներ գնելն է:
Արցախի զորակցությանը նվիրված հեռուստամարաթոնն անցկացվել է հուլիսի 18-ին: Այն անցկացվել է Ավստրալիայում ԼՂՀ մշտական ներկայացուցիչ Քայլար Միքայելյանի հովանավորությամբ և կազմակերպվել էր ՀՅԴ Ավստրալիայի «Դրո» կոմիտեի և նրա ուղեկից միությունների, Ավստրալիայի Հայ Դատի Հանձնախմբի և «Արմենիա Մեդիա» մամուլի և տեղեկատվական ընկերակցության կողմից:
