Երևանի Հովհ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանի գնահատմամբ՝ Խորենացի փողոցում կատարվում է այն, ինչ կատարվում է այն ժամանակ, երբ չի լինում կոնկրետ ծրագիր քայլ առ քայլ գնալու, և սկսում է դեր խաղալ կարևոր մարդկային գործոնը՝ հոգնածությունը: «Երբ մշտապես լսվում է նույն բանը, այդ ժամանակ փորձում են մտցնել որոշակի զվարճական էլեմենտ՝ տեսարանների էլեմենտը»: Նրա դիտարկմամբ՝ իրավիճակն ունի ողբերգական էություն՝ զինված մարդիկ, պատանդներ, զոհ, վիրավորներ. «Սպառնալիք եմ համարում, որ զինված խմբեր են կանգնած դեմ առ դեմ: Շատ վտանգավոր վիճակ է, շատ շուտ պետք է կարգավորել այս վիճակը»,- նշեց Ռ. Բաբայանը՝ հավելելով, որ լավ պատրաստված իրավաբանները և հոգեբանները կարող են ավելի լավ առաջարկներ ներկայացնել, բայց ինքը ևս ունի առաջարկ:
Նրա կարծիքով՝ նախ իշխանությունը պետք է երևան գա՝ իր պետական կառույցներով, ԱԺ-ում պետք է այս հարցը դառնա լուրջ քննարկման առարկա: «Նախագահը պետք է դիմի հանրությանը, հանրությունն իրավունք ունի իմանալու երկրի նախագահի վերաբերմունքը, առավել ևս, որ սա կառավարման ճգնաժամ է»:
Ռուբեն Բաբայանի կարծիքով՝ քանի որ երկիրը գտնվում է պատերազմական իրավիճակի մեջ, կառավարությունը պետք է որոշում կայացնի՝ ելնելով այդ իրավիճակից: Նրա խոսքով՝ կառավարությունը կարող է այնպիսի ելք առաջարկել, որ նահանջի տեղն էլ արժանավոր լինի, և որևէ մեկի համար լուծումը չընկալվի որպես հաղթանակ կամ պարտություն: «Երկիրը կարող է հանցանք գործած անձանց հնարավորություն տալ այդ հանցանքը մաքրել մարտի դաշտում: Առավել ևս այն դեպքում, երբ զինված խմբի անդամները դրան դեմ չեն և նույնիսկ ժամանակին առաջարկել են: Տանք հնարավորություն, որ նրանք զբաղվեն այն գործով, որին տիրապետում են»,- ընդգծեց Ռ. Բաբայանը:
Նրա դիտարկմամբ՝ ժողովուրդը սպասում է փրկիչների՝ իր վրայից հանում է պարտականությունները, և ժողովուրդը փողոց դուրս չի գալիս, քանի որ չկան գրավիչ գաղափարներ և գրավիչ, հետաքրքիր լիդերներ:
Մանրամասները՝ տեսանյութում:
