«Երբ հասարակության կառավարման առումով կա ինստիտուցիոնալ վաակում, երբ թվացյալ պատրանք կա, որ ամեն ինչ կառավարվում է, ունենք ԱԺ, ունենք կուսակցություններ, պետական մարմիններ, բայց խնդիրները չեն լուծվում, այսպիսի իրավիճակում շատ արագ հասունանում է քաղաքական նիհիլիզմը, որը շատ վտանգավոր է. հասարակությունն այս իրավիճակում համարում է, որ ինստիտուտների, քաղաքական գործընթացների միջոցով ոչինչ անել հնարավոր չէ, և բնականաբար ելքը մնում է միայն զենքը, կրակոցը»: Այս մասին «Առաջին լրատվական»- ի հետ զրույցում, անդրադառնալով արդեն հինգ օր շարունակ Հայաստանում առկա աննախադեպ իրավիճակին՝ կապված «Սասնա ծռեր» խմբի կատարած գործողությունների հետ, ասաց ՄԱՀՀԻ-ի փորձագետ, քաղաքագետ Ստյոպա Սաֆարյանը:
Անդրադառնալով խմբի գործողություններին տրված գնահատականներին՝ քաղաքագետը նշեց, որ անհեթեթություն է դրանք որակել որպես տեռորիզմ. «Առկա է պատանդառություն, սակայն այս դեպքում պատանդառության նպատակներն այլ են, տեռորիզմի ժամանակ՝ այլ. սա զինված ապստամբություն, զինված ընդվզում է, որի ընթացքում առաջադրվում են պահանջեր և ստեղծվում իրավիճակներ՝ հակառակ կողմի՝ իշխանության քաղաքական կամքի վրա ազդելու համար, որպեսզի նա ընդունի որոշակի քաղաքական որոշումներ: Տեռորիզմի դեպքում ևս պատանդներ են վերցնում, պահանջներ են դրվում, բայց այս դեպքում մենք գործ ունենք կենսագրորեն այլ տեսակի խմբի հետ, պատահական չէ, որ մարդկանց մեծ մասը հղում է կատարում նրանց կենսագրությանը, որ նրանք ազատամարտիկներ են՝ իրենց կյանքը հայրենիքի համար զոհասեղանին դրած մարդիկ, և այս դեպքում պատանդառությունը մեկ նպատակ ունի՝ դա իրենց անվտանգության երաշխիքն է»:
Ստյոպա Սաֆարյանի կարծիքով՝ գործ ունենք որոշակի տարածության մեջ լոկալիզացված, նույնիսկ բլոկադայի ենթարկված զարգացման հետ, որը քիչ առնչություններ ունի արտաքին աշխարհի հետ. 2000-ին մոտ զանգված էր ընդամենը հավաքվել:
Անդրադառնալով հարցին, թե արդյո՞ք խումբը հասարակության լայն զանգվածների աջակցությանը չի արժանանում, քանի որ, այնուամենայնիվ, հասարակությունը կատարվածը դիտարկում է որպես ահաբեկչությունը, Ստյոպա Սաֆրյանը պատասխանեց, որ ինքն այդպես չի կարծում. Նրա խոսքով՝ համակրանքի, քաղաքական դիրքորոշման առումով, թերևս, հասարակությունն աելի շատ այս խմբին է սատարում, քան իշխանության քարոզչությանն է հավատում: Ստյոպա Սաֆարյանի դիտարկմամբ՝ մոբիլիզացիա տեղի չի ունենում, քանի որ մարդիկ չեն սիրում հայտնվել ռիսկի գոտում, ապահովություն են փնտրում:
Քաղաքագետի դիտարկմամբ՝ այս խումբը զուտ քաղաքական տեխնոլոգիայի առումով սխալ է թույլ տվել, նախկին սխալներից դասեր չի քաղել. «Իմ տպավորմամբ՝ նրանք մտածել են, որ մարդիկ փողոց դուրս չեն գալիս քանի որ ոստիկանությունը կարողանում է նրանց դեմ հանել ջրցան մեքենաներ, զինված ոստիկաններ և այլն, մտածել են՝ այ, եթե մենք սիրտը պարալիզացնենք, մարդիկ դուրս կգան փողոց, և գրոհը կատարվել է ՊՊԾ գնդի հանդեպ՝ նկատի ունենալով, որ իշխանությունը չի կարող այնտեղից տեխնիկա և այլն հանել, և մարդիկ կմոբիլիզացվեն»:
Մանրամասները՝ տեսանյութում: