Արդեն 5-րդ օրն է՝ Էրեբունու տարածքում տիրող իրավիճակը ենթարկվում է ամենատարբեր վերլուծությունների և գնահատականների:
Քաղաքական գիտությունների թեկնածու, սահմանադրական հանրաքվեի քարոզարշավի «ոչ»-ի կողմնակից Թամարա Գևորգյանը, բնորոշելով ստեղծված իրավիճակը, «Առաջին լրատվական»-ի հետ զրույցում ասաց. «Պետք է զերծ մնանք ծայրահեղ որակումներից, երբ դետոնացնում են խնդիրը, այսինքն՝ ահաբեկիչներ և այլն: Մենք բոլորս էլ հասկանում ենք, որ սա տարբեր խնդիրների հետևանք է, և մարդիկ, ովքեր ընտրել են այս ծայրահեղ ճանապարհը, կարծում են, որ դրա արդյունքում կլինեն փոփոխություններ»:
Մեր զրուցակցի համոզմամբ՝ խնդրին պետք է ավելի լայն մոտենալ, թե՝ ինչ կատարվեց, ինչու, որն է սրա շարունակությունը: Ինչպես նկատեց տիկին Գևորգյանը՝ մենք բոլորս գիտենք, որ այս խնդիրը չի սկսվել Սերժ Սարգսյանով և չի ավարտվելու Սերժ Սարգսյանով. «Պատասխանատվություն պետք է կրեն երեք նախագահներն էլ, և ասելիք պետք է ունենան նրանք երեքն էլ»:
Ուստի մեր զրուցակիցը կոչ արեց կողմերի չբաժանել. «Մենք ոչ թե միմյանց թշնամիներ ենք, այլ տարբեր կարծիքներ ու մոտեցումներ ունեցող մարդիկ: Եվ քանի որ ուժը իշխանությունների ձեռքին է, ուրեմն նրանք պետք է թելադրեն ավելի պետականամետ և հայամետ մոտեցումներ: Ուստի ես չեմ հասկանում նրանց այս լռությունը»:
Մեր զրուցակցի համոզմամբ՝ սա ինքնամաքրման հնարավորություն է՝ իշխանությունների համար, հասարակության համար, ծայրահեղականների համար. «Այսինքն՝ մենք բոլորս ունենք արժանապատվության խնդիր: Եվ ես չեմ հասկանում հատկապես այն կանանց անտարբերությունը, ովքեր այսօր իշխանության մեջ են: Ո՞ւր են նրանք, ո՞ւր է նրանց ասելիքը՝ իբրև կին, մայր, քաղաքական գործիչ»:
Թամարա Գևորգյանը հանդես եկավ կանանց ուղղված կոչով. «Կանա՛յք, եկեք գնանք այնտեղ, հասարակությունը ձեզ չի հոշոտի, որովհետև մեր հասարակությունն անցել է հանդուրժողականության և բարության բարձրագույն սանդղակը: Եկեք միասին մտնենք ուղիղ եթեր, քննարկենք, որովհետև կարծես բոլորս պատի առաջ ենք»:
Նրա կարծիքով՝ այս հարցին պետք է լուծում տան կանայք, քանզի տղամարդիկ կարծես լուծումներ չեն գտնում. «Չգիտեմ՝ նրանք ուր են թաքնվել, որ կաբինետներում են խորհրդակցում, ինչ են մտածում»:
