Արդեն 5-րդ օրն է՝ «Սասնա ծռեր» խմբի կողմից գրավված է ՊՊԾ գնդի տարածքը, զինված ապստամբները պատանդ են պահում ոստիկանության 4 ներկայացուցչի, և իրավիճակը փոխանակ լուծում ստանալու՝ կարծեք թե օր օրի ավելի փակուղային է դառնում: Որքանո՞վ է արդարացված այս միջոցով իշխանափոխության հասնելու փորձը մեր երկրում. «Առաջին լրատվական»- ի հետ զրույցում անդրադառնալով այս հարցին՝ «Ազգային անվտանգություն» կուսակցության նախագահ Գառնիկ Իսագուլյանը նշեց. «Պետք է ամեն ինչ անել, որպեսզի մենք չունենանք նոր զոհ. սա կարևորագույն խնդիրն է, որ պետք է լուծվի, երկրորդ՝ մենք պետք է ընդունենք, որ իսկապես քաղաքական, սոցիալական, տնտեսական և բազմաթիվ այլ հարցեր մեր երկրում այնպիսի օրհասական վիճակում են գտնվում, որ օր առաջ լուծման կարիք ունեն:
Դժվար է ասել՝ իշխանությունները չեն կարողանում, թե չունեն համապատասխան կամք, որպեսզի այդ խնդիրներին լուծում տան: Հասարակությունն ինքը նույնպես կարծեք թե չի գիտակցում կամ չի ընկալում, թե օրենսդրության շրջանակներում ինչպես կարող է ինքնապաշտպանության դիմել՝ իր իշխանությունն իրացնելու առումով, և երբեմն ընտրությունների ժամանակ, երբ որ իր իշխանություն է ձևավորվում տարբեր մարմինների միջոցով, այդ պահին հասարակությունը, որ պետք է դրսևորի քաջությունը, համարձակությունը՝ օրենքներով իր համար նախատեսված, չի օգտագործում, քաղաքական, հասարակական կազմակերպություններն աշխատում են հընթացս գործընթացների:
Նման օբյեկտի վրա գրոհելով ես չեմ կարծում թե կարելի էր դնել քաղաքական հարցեր, որոնց լուծումն այսօր իհարկե կա, բայց միաժամանակ այդ տղաներին ահաբեկիչներ անվանելը չեմ ընդունում, այդ տղաներից շատերին շատ լավ ճանաչում եմ, հատկապես համակարգող Պավլիկ Մանուկյանին, որն իր հայրենասիրությունն ապացուցել է ղարաբաղյան պատերազմի ժամանակ, նույնը Վարուժան Ավետիսյանը և մյուսները:
Հուսահատ տղաներ են, որոնք լուծման այլ ելք չեն տեսել, և դրանում առաջին հերթին մեղավորը, իհարկե, իշխանությունն է, հասարակությունն ինքը, յուրաքանչյուրս մեր մեղքի բաժինն ունենք այս իրավիճակի համար:
Քանի որ իրավիճակը բավականին բարդ է, երկու կողմում էլ զինված հայորդիներ են, յուրաքանչյուրս՝ այդ թվում նաև քաղաքական ուժերը, պետք է ամեն ինչ անեն, որպեսզի ծայրահեղական պահանջներ որևէ կողմից չդրվեն»:
Հարցազրույցն ամբողջությամբ՝ տեսանյութում:
